مەگېڵناوە، مەولەوی شاعېر یانەو حامېڎ بەگ کوڕو وەسمان پاشای بۊن، کۊنیشتەکەنە باس جە تەوانایی میرزا ئۆلقاڎرو پاوەی کەران پېسە شاعېرێ، بڕێشا ماچان شاعېرێ قابیلەن، بڕێتەرشان پا تەرزە دڎانېش نمەنیا پۊرە، مەولەوی ماچۊ: من ئی دوە دېڕە شېعرەشە پەی کیانۊ، جوابەکەشەنە بەرمەگنۊ ئینا چ پلێوەنە.
مەولەوی ناحەزیۍ جە ئامای زمسانی نیشانە مڎۊ، کە شەوەش پېسە هەسانی چەنی کاردی تیژە کەرۊن، ئەپاسە هەوا تیژەن و سەردەن، یان بڕەرەن، ڕۊیچشەنە قەترە قەترە ۋارۊن، یانی بە کەمی، بەڵام میرزا جوابەکەنە پایېز بە فەسڵو ئامای سەروکاری دەسەڵاتێ نیشانە مڎۊ ، پایېز تاجەی کافوورینەش ئاماڎەکەردېنە پەی سەرو لووتکەکا، پەی پاشاو زمسانی.
هەوای بادەی نۊ...
خوڎا ناوەرۊ پایېزی بەڎخۊ
بەرزە درەختان مەوان سیاچۊ
بە شەو مەسازنۊ تیرەی سوهان ساو
بە ڕۊ مەوارۊ قەترە قەترەی ئاو
جوابو میرزای:
هەوای بادەی نۊ سەڵتەنەت وەردەن
تاجی کافوریش ئاماڎە کەردەن
ها وەختەن شەوێ جە شیرین خاوان
بنیۊش نە فەرق قولەی سەرکاوان
هەر وەختێ مەیۊ هەوای تۊف سەرد
سەنگ مەبۊ بە ئاو، ئاو مەبۊ بە بەرد
هەر وەختێ مەیۊ هەوای ستېزە
میر جە موغاران مەکەرۊ ڕېزە.[1]