وەسفی جوانی...

هەرچی وەشیېنۍ، جوانی وەهاری، گەڵاخەزانو پایېزی، دیمەنو چەرمەپۊشو زمسانی، بۊی وەنەوشە و گوڵان، سەیری ڕوخساری نازداران، دیڎەنی ڕەفېقا، نیگاو نازارا، وەشیۍ فرېنۍ، میرزا ئۆلقاڎر گردش بەیان کەردېنۍ، بەڵام
میرزام هەرچیم وات یە گشت هەر وەشەن
جەی گشت وەشیدا قاڎر بۍ بەشەن.

جوانی وەشەن...
جوانی وەشەن، جوانی وەشەن
میرزام شەوق و زەوق جوانی وەشەن
سوخەن ڕازنای مەرجانی وەشەن
ئیعتیبار مووی قەترانی وەشەن
شنەوای شنۊی سەمع و گۊش وەشەن
ئاداب و تەعلیم عەقڵ و هۊش وەشەن
باڵا باڵای بەرز چوون شاتووڵ وەشەن
جاهیڵی و شەرت مشتو پووڵ وەشەن
سەیر بانەوبان بەرگت و بۊ وەشەن
ڕەفیق گیان و من گیانو تۊ وەشەن
سوب سەیر ڕاگەی سەرکانی وەشەن
نیگا پەی ڕەقیب نیهانی وەشەن
چەنی هام‌فەردان ئېواران وەشەن
سەرگۊشی نەپای دیواران وەشەن
تەماشای گەردەن ئاهووی بەڕ وەشەن
تکەی قەترەی ئاو زوڵف تەڕ وەشەن
ئیشارەی ئەبرۊی مەیل دۊس وەشەن
نەڕای دۊس خاس بەڵا و کۊس وەشەن
بەین بەستەیی نۊ، چەنی لەیل وەشەن
شەرت دڵداری، وەفا و مەیل وەشەن
گلەی دەم وە جەنگ ڕېزەی ڕاز وەشەن
شەقەی ماچوو مووچ غەمزە و ناز وەشەن
دادەی دانای پاک داوەری وەشەن
حەراڵی حاڵ‌زان هامسەری وەشەن
شەوان تا وە ڕۊ بۊ وە بۊش وەشەن
تاڕۊ بۍ خەیاڵ عەیش و نۊش وەشەن
چەنی ڕەفیقان دیدەنی وەشەن
شەوان تەقەی دەم‌نشینی وەشەن
شیرینی و شەربەت شەوبازی وەشەن
گوڵ دەستەی جوراب دڵوازی وەشەن
دەس‌چنی مەچۊی هامدەردان وەشەن
زەوق زانای نۊ هام‌فەردان وەشەن
سەدای خۊش‌خانان نەوای نەی وەشەن
ناڵەی عاشقان پەیاپەی وەشەن
دەنگ نۊشاڎی سەدای ساز وەشەن
ڕەقس ڕەقاسان بازی باز وەشەن
ڕەفت ڕەژبەلەک لۊنگ وە کۊڵ وەشەن
شەقەی پەنجەی کەوش پای دەهۊڵ وەشەن
خەشم و نەزاکەت لەنجەی یار وەشەن
خەندەی مەیل گەرم خاتردار وەشەن
شاخەی شریخەی گا وە کۊ وەشەن
سەدای هەی ئازیز چۊونی تۊ وەشەن
حەقیقەت زمسان تفاق بۊ وەشەن
نە هەرجا مینگەی مەزاق بۊ وەشەن
ڕاحەتی و ئاهەنگ بېکاری وەشەن
زەم زەمەی لای خوان بوخاری وەشەن
شېوەی پەردەی شەرم نیگاران وەشەن
فەزای فەسڵ وەخت وەهاران وەشەن
سەیر کەشوو کۊ سەر دیار وەشەن
ڕەنگ سارا و دەشت میرغوزار وەشەن
شکۊفەی عەجەب سەرخامان وەشەن
بۊی وەنەوشەی پای نەمامان وەشەن
هەناسەی شەماڵ بۊی گوڵان وەشەن
زایەڵە و ئەفغان بوڵبوڵان وەشەن
سەفای هەمیشەی ئېڵاخان وەشەن
سەیاڎیی و کۊگەرد سەرشاخان وەشەن
پارېزگای پای ڕېز کەڵ‌ڕەمان وەشەن
ناڵەی ڕەعد ئاسای ماردومان وەشەن
عەتر گوڵ سۊسەن شەوبۊی هەرد وەشەن
جاسوزگەی نەچیر بەردەوبەرد وەشەن
تای بەڕەزای تاش بۊی چنوور وەشەن
سەیر سەربەرزان دووراودوور وەشەن
نە دامان کۊ سیاماڵ وەشەن
سەیر مەحبووبان زوڵف و خاڵ وەشەن
جەرگ و بەز نەپای موغاران وەشەن
چەمو خەم چەنی خەمباران وەشەن
هەر کەس ئاخینەن بواچۊ ئاخ وەشەن
سەیر چەم و چەم باخ ئه و باخ وەشەن
تەلمیت‌بار وەشەن سەرهەوار وەشەن
پای نسار وەشەن سای دەوار وەشەن
تەماشای سەوزەی چەمەندان وەشەن
ئیسراحەت نەپای سەهەندان وەشەن
شەرارەی هامن گەرمی مەیل وەشەن
داران گشت جە بار میوەی کەیل وەشەن
سای هەر سەهەندی مەنزڵەن وەشەن
جای هەر پەسەندی جای دڵەن وەشەن
جە هامن ویەرد نۊپاییز وەشەن
واڎەی نۊسوەیل گەڵاڕېز وەشەن
زەردی ڕەنگ‌زەرد نەداران وەشەن
چەمیای بار خەم چناران وەشەن
شاخەی تاف ساف قەڵوەزان وەشەن
ئەلوەدای خەزان پای ڕېزان وەشەن
کۊچ کەردەی ئەحشام خېڵ ئەو خوار وەشەن
پەشېوی پەرداخ شەدەلار وەشەن
تەماشای قەتار مەی و کۊڕ وەشەن
نیمەشه و هاڕەی زەنگ و قۆڕ وەشەن
سەیاحیو سەفای بازاڕان وەشەن
زندەگی و دەوڵەت جە شاران وەشەن
نە بەزم شادی نەوای نەی وەشەن
ناڵەی عاشقان جامی مەی وەشەن
سەیر پاوەشار ماڵە و ماڵ وەشەن
جە پاوە هەم گەشت کۊیمەکاڵ وەشەن
میرزام هەرچیم وات یە گشت هەر وەشەن
جەی گشت وەشی دا قاڎر بۍ بەشەن
نە مەیل وەهار نە سەحرا و کەشم
ﮪەر وە لوتف حەق زەرەی دڵ وەشم.[1]