سیپان ئامێدی پارلەمانتارێ نەوەی نوێ د پارلەمانێ کوردستانی دا بۆ ئێن ئاڕ تی ڕاگەهاند، هەموو هێز و ئالیان پشکداری د کابینەیا هەشتێ یا حکومەتا هەرێما کوردستانێ دا کرن، پارتیێ ژی ب پلان ئەو حزبە وەکی دیڤەلانک و هەڤئاوازێن خۆ بکارئینان.
ئەو یەک ژی دیارکر، ب ڕازیکرنا ئۆپۆزسیۆنێ ب چەند پۆستێن ڕەمزی، پارتیێ بێی کو حسابێ بۆ نەرینا یەک ژ وان ئالیان بکەت، سیستەما پاشەکەفتا مووچەیێ فەرمانبەران دانا.
پەرلەمانتارێ نەوەی نوێ داخویاکرن ژی، زێدەباری کو تەخا فەرمانبەران و ب تایبەت مامۆستایان ل دژی ڤێ پێنگاڤا پاشەکەفتکرنێ نەرازیبوون نیشاندان، لێ ژبەر کو چ ئالیەکێ ئۆپۆزسیۆنێ ژبەر پشکداری د پارڤەکرنا کێکا دەستهەلات و هەبوونا پۆستان دا کرن، خوەدی ل دەنگێ نەرازی دەرنەکەتن، پارتی و یەکێتی زێدەتر لسەر کارێن وان هاندان، هەیا پارلەمان ژی هاتە داخستن.
هەروەسا دازانین، پارتیێ شیا وان حزبان د ناڤ خۆدا بحەلینیت، د نها دا چاڤێ وان ئالیان ژ ڕەحما پارتیێ یە بۆ پێدانا پۆستان د کابینەیا نوو دا، ب ڤێ یەکێ ژی پارتی ترس ژ هەبوونا وان دبن ناڤێ ئۆپۆزسیۆنێ دا نەمایە و هەر تشتێ بخوازیت دکاریت ب ڕێکا وان بکەت.
د دواییا ئاخافتنا خۆدا سیپان ئامێدی بەحسا دەرکەتنا نەوەی نوێ و ڕوولێ وێ کر و ڕاگەهاند، پارتی باش دزانیت د نها دا تاکە ئاستەنگی لپێشیا وێ نەوەی نوێ یە و باش تێگەهشتیە کو نەوەی نوێ ئۆپۆزسیۆنا ڕاستەقینەیە، هەروەسا پشتڕاست بوویە کو نەوەی نوێ خۆ بدەستڤە نادەت و بەرهەڤ نیە دگەل پارتیێ بجڤیت و دێ ڕووبڕووی هەموو سیاسەتێن وێ یێن فاشل بیت[1].