لەدوای بوومەلەرزەکەی 12ی ئەم مانگە لە #دەربەندیخان#، جارە جارە دێن دەرگای خانووەکەیان دەکە‌نەوە تا بزانن هیچ دیوارێکی نەڕووخاوە، ئەمە نمونەی ئه و سەدان خانووەیە لەم شارۆچکەیە کە زیانیان پێگەشتووەو قایمقامیەتی قەزاکە دەڵێت، بۆ ئەوە ناشێن کە خەڵکیان تێدا بژی.
بەگوێرەی ئاماری لیژنەکانی خەمڵاندنی قایمقامێتی دەربەندیخان 325 خانوو لە بومەلەرزەکەدا درزیان تێبووە و مەترسی داڕمانیان لێدەکرێت.
بەگوێرەی ئاماری ئه و بۆردەی بۆ بەدواداچوون لە زەرەر و زیانەکانی بومەلەرزەکە دروستکرابوو، هەزار و 500 خانوو زیانیان بەرکەوتووە و 325 خانوویان بۆ ئەوە ناشێن کەسی تێدا بمێنێتەوە. لەگەڵ ئەوانەشدا پێنج خوێندنگا وێران بوون و پرۆسەی خوێندنیان تێدا ڕاگیراوە.
لە دەربەندیخان نەخۆشخانەی گشتی شارەکە و دوو بنکەی تەندروستیش وێران بوون، ئەمە بێجگه لە زیانی پڕۆژە خزمەتگوزارییەکانی ئاو و کارەبا، کە سەرجەمی زیانەکانی هاوڵاتیان بە 17 ملیار دینار مەزەندە دەکرێت، بەڵام تائێستا زیانی کەرتە حکومیەکان نەخەمڵێنراون.
هەرچەندە حکومەتی هەرێم یەک ملیار دیناری بۆ چاککردنەوەی پڕۆژەی ئاو و کارەبای دەربەندیخان تەرخانکردووە، بەڵام تائێستا هیچ بڕە پارەیەک بۆ قەرەبووی هاوڵاتیان تەرخان نەکراوە، ئەمە لە کاتێکیدایە حکومەتی عێراق بڕیاری قەرەبووکردنەوەی زیانلێکەوتووانی بومەلەرزەکەی داوە.
سەرباری زەرەر و زیانەکانی خانووی هاوڵاتیان و دامودەزگا حکومییەکان بەهۆی بومەلەرزەکەوە، بەنداوی دەربەندیخانیش زیانی بەرکەوتووە و بەهۆی ئه و زیانەشەوە پلانی کارکردن بۆ گلدانەوەی ئاو لەم بەنداوە لە ئەمساڵدا گۆڕانکاری بەسەردا هاتووە. حکومەتی عێراقیش بڕیاری تەرخانکردنی بڕی سێ ملیار دیناری داوە تا بەنداوەکەی پێ نۆژەن بکرێتەوە.[1]
29-11-2017