لاچەمێو سەروو کوڵە ڕۊمانەو (هەرە مەینەتیەکەو مامۊ بارامی)
نویستەی: #هەورامان ڕۆستەمی#

فرە وەشحاڵەنا کە واوەی داستانێوە خۆماڵیە و وېمانێم واناوە جە کاک ڕەزا بەهمەنی وەشەویسی، پەڕ بەدڵ ئاواتوو لەش ساقی و بەردەوام بېیەیم هەن پەیش.
وەڵێ گرد چېویەنە مشیۊم ئېشارە کەروو بە سەبک و شێوازوو نویستەوحەمەڕەزا بەهمەنی، ڕئالیسم جادوویی.جە دەسپەنە کەردەو داستانەکێوە بە ئاشکرا پەیما بەر گنۆ کە ئینە ڕئالیسما و بە وردی باسوو زەمان و مەکانوو داستانەکێ کەرۊ و وەسفوو تەبیعەتێ ڕېک پېسەو نەقاشێوی.
جە درێژەو داستانەکێنە وەختێو حەیوانەکە دەس کەرۊ بە قسە کەردەی و نەقڵوو وېش گېڵنۆوە، ئێتر ملۆ دلێ گ نېیا سەرو جۊروو نویستەی ئی ڕۊمانێوە قسێ کەرمۍ و تەنیا پەی ئانیشا حەز کەرا متاڤۆ حەواڵەو داستانەکاو بەختیار عەلیشا کەروو.
نامۍ ڕۊمانەکێ:
حەتمەن مشیۊم جە (4) هەزار وشا یام کەلیما زیاتەرەبۊ، بەڵام ئی داستانێ هیچ وەخت مەیاڤۆ (2500) وشێ، کە پاسنەن جە ڕوو ڕېژەو کەلیمەکاشەرە مەتاومۍ ڕۊمانەش واچمێ، بەڵام دلېنە و پەیڕەنگش ڕۊما و تاکو ڕادېو دوورا جە داستانێ درێژێ و داستانێ کۆتای.
بە پەیلواو من هەر وانەرێو کە ئی داستانێ موانۆوە دماوە تەنیا کەلیمێوە گنوونە ویرش کۆپان لارا.کە پاسنەن نامۆ ڕۊمانەکێ تاوێ کۆپان لاربۊ تاکو پەیوەنی فرەتەرش گېرتەیا چەنی وانەر و وەردەنگی.
دەس پەنە کەردەی (opening)
یۆ جە گەورەتەرین عەناسۆروو داستان یام ڕۊمان نویستەی بە پەیلواو من شێوەو دەس پەنە کەردەیشا، پەی وانەری فرە گرنگا کە چا ئەوەڵاوە نویسەر بتاڤۆ لکەش دۊ بە داستانەکێوە.ئا چن خەتەو ئەوەڵیە ئێڼەو دلېنەو داستانەکێ مۆهېما و فرەو وانەرا چن خەتەو ئەوەڵیەنە داستانەکێ مازا جیا، بەڵام کاک ڕەزا چی داستانێنە بە زوانیوی سادە و بە کەڵک گېرتەی جە سەنعەتوو ئیجازی تاوانش هیچ وانەری نەتۆرنۆ جە وېش، بەڵکووم وادارش کەرۊ کە خەت بە خەت بلۆ وەرەوە و وېش بەشێو جە داستانەکێ بزانۆ خیام وېش بنیۆ جیای یۊ جە شەخسیەتەکاو داستانەکێ.[1]