باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و چل و هەشتەمە
شای خەیرولبەشەر، دمای ئانەی چەنی شش نەفەرەکەی نیشتەرە، دەسشکەرد بە مۊچیاری و بەیانکەردەی ئایینو ئیسلامی پەیشان، ئیتر داواو ڕوخسەتیشان کەرد جە پېخامئاوەری، حەزرەتیچ ئیزنش دێ تا بلاوە وە ماواو وېشان و دینەکەی ڕوشنکەراوە پەی هۊزەکەیشان، کە هوزو خەزرەجی بېنۍ.
با وا جەی گوشە بنیشین وە هەم
واتشان: بەڵۍ ئەو هەر شش نەفەر
نیشتەن نە زەمین چەنی پېغەمەر
ئەوەڵ فەرماییش جە نبووەت کەرد
وە ئەتباعی دین ئەوان دەعوەت کەرد
چن ئایەی قورئان پەرېشان وانا
تاکە جە هەر شش بڵندبی هانا
واتشان: ئەی شەخس، عەزیموششانەن
بە خوڎا پېغەممەر ئاخر زەمانەن
عولەمای یەهوود تەکیەک دان خەبەر
زهوورش کەردەن خاتەم پېغەممەر
مەعلووم بی لېشان پېغەممەر وېشەن
موهر نیشانەی نبووەت پېشەن
وە جە مەدینە با سبقەت کەرین
ئیمان بە حەزرەت ڕەسوول باوەرین
چونکم دڵوەش بین ئومووری جایز
هەر شش بە دەوڵەت ئیمان بین فایز
نامۍ خوداوەند وە حەقق بەردشان
دینی محەمەد قبووڵ کەردشان
جە نۊ عەرز کەرد یا خەیرولبەشەر
جە ڕووی مەرحەمەت ئېمە ڕوخسەت دەر
تا بشین وە لای قەبیلەی وېمان
جە سایەی تۊ گشت، موتیعەن پېمان
تایەفەی خەزرەج هەرچی هەن تەمام
بەڵ باوەریشان وە دینی ئیسلام
شای خەیرولبەشەر ڕوخسەت دا پېشان
تەشریفشان بەرد وە ماوای وېشان
ئاینی ئیسلام ئاشکرا کەردەن
سوجدەی خوڎاوەند بۍ هەمتا بەردەن
ئەوسا پەی حەزرەت شای خەیرولئەنام
مەکەردەن پەیام هەر سوب تا بە شام.[1]