بنەما بنەڕەتیەکۍ ڕاوڕەچەو یارسانی
بەشۊ دوەمۍ
دوونا و دوون:
یارسانەکۍ پاسنە مزانا مروڤ سەروەختو مەردەیشەنە ڕوحەکەش جە لاشەیش جیابۊۋە، گرد ڕوحێ هەزارو یەک تەن مەگېڵۊ، ئینجا ملۊنە دلۍ دنیاو جاویدانی (دنیاو نەمری) ، پینەیچە ماچان (دوونا و دوون) و ڕوحەکا، گېڵای ڕوحەکا چوار جورېش هەن:
(نەسخ: جە مروڤۆ پەی مروڤی، مەسخ: پەی دلۍ لاشەو گیانەوەری، ڕەسخ: پەی دلۍ ڕوەکی، فەسخ: پەی دلۍ گیانەوەری چزوۋەداری پېسە مار و مارەکۊڵی) ، ئېڎۍ ماچان: مەردەی پېسەنە ئا (سۊنۍ) کە دلۍ ئاوېنە ۋېش نوقم کەرۊن و پڕێنە یاگێ تەرۆ سەرەبەرمارۊن، ئی باوەڕەشا چەنی پەیدیای هیندوسەکا پەی ڕوحی یەکانگیربۊن، چڼین سروودۍ و پەخشانۍ دینیېشان هەنۍ کە (دوونا و دوون) و ڕوحەکا چەنەشا ۋزیان ڕوۋە، پەی نموونەی (شاخوشێن) واتەنش:
مامام جەلالە کاکەم ڕەنگینە
دوون وە دوون ئامام چینە وە چینە
ها ئیسا یورت و نامم خوشینە
هەرکەس بشناسۊم پاکش مەوکینە.
بە ماناو: ئەڎام نامېش (جەلالە) و کاکەم نامېش (ڕەنگین) ە، ڕوحەکەم دلۍ چن تەنێنە گېڵان تاکو یاوان ئی تەنەو ئیسەی، نامم (خوشینە) ، هەر کەسێ بە ڕاسی بشناسۊم هیچ کینەو غەرەزێ دڵشەنە نمەمەنۊ.[1]