میرزا ئۆلقاڎر، جوابو نامەکۍ موحەمەد وەکېڵی مڎۊوە، موژدەش مڎۊ پەنەنە کە (قاڎر) پېسە یارێ بە وەفای مەبۊ بە هامڕازش، ئیتر بەختەش دووشش ماوەرۊ، بە وەسڵو یارېش شاڎ مەبۊ، ماچۊ: مادام پەی چارەو دەردەکېت پەنات پەی من ئاوەردېنە، ئانە قادر یارەن یار، یارێ وەفاڎارەن.
ئاغەکەم دەردت ئاغەکەم دەردت
خوڎا وەکېڵ بۊ پەی دەوای دەردت
ئېشه و خاس مەبۊ قافیەی فەردت
بیاونۊت بە وەسڵ شۊخ بۍ گەردت
ئاگان جە ئەحواڵ هەناسەی سەردت
مەبۊت وە هامڕاز شای گەردەن زەردت
سەوگەند بۊ سەوگەند چەنی دۊس وەردت
دو شش ماوەرۊ دیسان هەم نەردت
معالجەی دەرد وە (قادر) کەردت
قادر یارەن یار موژدەبۊ بەردت.
دیسان موحەمەد بەگو وەکېڵی پەی دوەم جاری جوابو میرزا ئۆلقاڎری مڎۊوە، ماچۊ: چارەو من تەنیا جە لاو تۊن، من چە کارەنا، تەنیا تۊ متاوۍ ئازاری سەختم ساڕېژ بکەری.
ئېشه و دیارەن وەلوەلەم کۊ کۊن
شەرارەی گڕەی دەروونم تۊ تۊن
چرقەی قرچەی جەرگ زامەکانم سۊن
جەی ئازار سەخت عەزابم بۍ شۊن
قاڎر وە زاتت ئومېد جە لایی تۊن
وەکېڵ چە کارەن ۋجودش جە کۊن.[1]