#غازى فاتح وەیس# ، لە (38) ەمین ساڵیادیدا.
#وریا عومەر امین#
غازى فاتح وەیس لە ساڵى 1979 هاتە لەندەن بۆ خوێندن لە زانکۆى لەندەن.. من ئەوسا لەوێ خوێندکار بووم .. ساڵێک لە زانکۆى لەندەنى خوێند پاشان خوێندنەکەى گواستەوە زانکۆى ئێسێکس لە کۆڵچستەر..لەوێ بڕوانامەى ماجستێرى وەرگرت و لە ساڵى 1981 گەڕایەوە زانکۆى سلێمانى و بوو بە بەڕێوەبەرى پەرتووکخانەکەى..لەگەڵ گواستنەوەى #زانکۆى سلێمانى# چوو بۆ #هەولێر# .. دواى ماوەیەک چووە سەر ستافى بەشى کوردى و بوو بە سەرۆکى بەشى کوردی لە کولێجى ئاداب.
بەیانییەکەى 14-11-1985 مامۆستا (غازى فاتح وەیس) لە هەڕەتى داهێنان و کەنجیدا گیانى خۆى لە دەستدا بە کارەستێکى دڵتەزێن بە ڕووداوی تامپۆنی ئوتومبیڵ لەسەر ڕێى نێوان هەولێر #کەرکووک# نزیک #پردێ# .. بەرەو #سلێمانى# دەچوو بۆ ئامادە بوون لە ئاهەنگى یادى (201) ساڵەی دامەزراندنى شارى سلێمانى..کچێکى یەکساڵەى بە ناوى (هەژین) و (سەرگوڵ عەلى حەسەن ) ى خێزانیى لە دواى خۆیدا بەجێ هێشت ..
هەر ئەوسا وتارێکم لەبارەى ئەم کارەساتەوە نووسى و لە گۆڤارى (#ڕۆشنبیرى نوێ# ژمارە 108 ى ساڵى 1985 ل 227) دا بڵاو بووەوە..
$ئەستێرەیەک .. ئاوا بوو$
وریا عومەر امین
غازى فاتح وەیس .. ئەستێرەیەکى تازە هەڵهاتووی ئاسۆ تاریکەکەى زمانەوانیمان بوو ..لەگەڵ ئاوابوونیدا ئەو ئومێدە زۆرەى پێیمان بوو نێژرا.
غازى فاتح وەیس.. خونچەیێکى تازە پشکووتووى گوڵزارە کەم گوڵەکەمان بوو ، وەرى پێش ئەوەى بۆن و بەرامەکەى جیهانى زمانە شیرینە هەناسەساردەکەمان بۆنخۆشکات.
غازى فاتح وەیس.. بە گیانێکى ئەکادیمیى پتەو و توانا و وزە و تاقەتێکى بێ پایان و پشتێکى ئەستوور بە ڕێبازى زانستییەوە پێى نایە مەیدانە یەکجار کزەکەى زمانەوانیمان ..
بەم تەمەنە یەکجار کوورتەى ژیانى ئەکادیمیى بوونى خۆى سەپاند... بەرهەمێکى زۆرى پێشکەش کردین ..پەرتووک و گەلێ وتار و لێکۆڵینەوەى بڵاو کردەوە.. زۆرى تریشى بەدەسنووسى ماوەتەوە..گەر مەرگ وازى لێ بهێنایە پڕۆژەکەى ژیانى خۆى تەواو بکات، گەنجینەیێکى زۆر بە پیت و بەنرخى بۆ دادەگرتین ...خزمەتێکى زۆرى بە زمانى کوردیى دەگەیاند..
بەرهەمەکانى غازى فاتح وەیس جێى شانازین..ڕەسەنن ، وانەن بۆ فێربوونى بەرنامە و پێڕەوى زانستى. .پار بوو (1984) ئەمیندارێتیى گشتیى ڕۆشنبیری و لاوانى ناوچەى کوردستان پەرتووکێکى بۆ لەژێر ناوى (#فۆنەتیک# ) دا بڵاوکردەوە .. نامەى ماجستێرەکەى بوو لە زانکۆى ئێسێکس لە ئینگیلتەرا.. تیایدا دەنگەکانى زمانى کوردی لە ڕووى فیزیاوییەوە بەهۆى تازەترین دەسکەوت و پێڕەوەکانى بوارى دەنگسازى بە هۆى ئامێرەکان شیدەکاتەوە..و یەکەم جارە پەرتووکێک بەم ناونیشانە دەرچێ ناوەکەى بگونجێ لەگەڵ ناوەرۆکەکەى. ئەم پەرتووکەى دەبێتە سەرچاوەیێکى ڕەسەن بۆ بوارى دەنگسازیى زمانى کوردى.
بە کۆچکردنى ناوادەى ئەم گەوهەرە نایابە زیانێکى گەورە بە بوارى زمانەوانیى کوردى گەیشت.
لە ئاست ئەم کارەساتە هەر ئەوەندە دەتوانین بڵێین..هەزار ڕەحمەت و دروود لە گیانى پاکى سەبوورى بۆ کەسوکارى..
.
گۆڤارى (ڕۆشنبیرى نوێ) ژمارە 108 ى ساڵى 1985 ل 227
[1]