هۆرامی، زوانی هۆرامی یام بېکەسی؟
بەشو: یەکەمی
بە شانازیەوە چەوپەڕوو وەشحاڵیوە جە زۋانە کۊردیەکا سۆرانی وکرمانجی پلەو هەشتوو زۋانە زینەکاش بە دەس ئارد،
ئینە فرە فرە یاگێ شانازین، بەڵام زۋانی هۆرامی، یا لەهەجەو هۆرامی، کە چڼن ساڵێ هۆرامیە ئازیزەکێ ئامێبێنێ گژمی پەی پەرەسانای و زیڼە کەردەیوە زۋانی هۆرامی وتا یاگێ لوەی کەواچۍنێ هۆرامی زواناو جیان جە کوردی وجیان جەگردو دنیێ؟!
ئینە ڕاسی ودروۆیش پاو سەلێقەو وانەری، بەڵام هۆگرەکێ زوانی هۆرامی چکۆ بینێ وەختێ سۆرانی و کرمانجی مەقامشا ئارد،
ئېمە چن ساڵێ چېوەڵ پەلیانەو گروو و تلگرامیما وەش کەرد ودەیان گروێ وەشێ بیێ و گرد کەس چاگە بی بە نویسەرو شاعروو زاناو زۋانی وخەمەوەرەو هۆرامانی، بەڵام چېش بی هۆو ئانەی ئا ئایېرە کوشېیاوە؟ ئا تەبوو تابە نیشتۆ؟
ئیسە بەڕاسی جیا چانەی کە وەشحاڵێنمێ پەی ئانەی زوانی کوردی مەقامێ وەڵێ زوانو فارسیش لانی کەم ئاردەن، بەڵام مشۊم ڕوەکەرمۍ ئانیشا پیسەو چڵۆسکێ چن ساڵێ گیسیەیبێنێنەو واچینی ئانا هۆرامانشا یاونا بە یۊ جە زۋانە گەورەکا دنیێ!
بەڵام چن خاڵێوە بیێ هۆو ئانەی هۆرامی دیسان بۍ دەسو بۍ کەس کەوت قەراخوو حەر پاسە یۊ چا زوانانە کە بە زوویی حلبۊ دلی زاراوە کا تەروو کوردینە!
بڕێ دڵسۊزی واقعیی و ڕاستە قینێ هۆرامانی کەوتێ شۆنەو زۋانی ودەسشا کەرد کتېب نویستەی وکۆنگرە گېرتەی، بەڵام بڕێ سو ئیستفاڎەچیێ چی پیلانێ پەی دوڵە مەند کەردەیوە کیسەیشو پۆڵ پیڎا کەردەی ونامە بەرکەردەی وشۆرەت پیڎا کەردەی کەوتێ دلێ گمەکێ و خەڵکوو هۆرامانیچ بە سەماو شاڎی کەوت شۊنیشا!
هەڵای هۆرامان فرەش مەنەن یاوۆ بەیاگێ تۆم کوولەکە ورەشش چەنی ئوستادوو دانشگای ڕاشا سەبارەت بە زۋانی یۊبۊ، خەڵکی بە سەر جەم حەر کیسەش پەڕبۆ ئیتر پەیش مۆهێم نېیا زوانی هۆرامی مرۊ یا مەنۆ!
فەرید عەباسی.[1]