ناونیشانی بابەت: بنەماڵەى مەلای گەورەی کۆیە، خانووەکەیان پێشکەشی فەرمانگەی شوێنەواری کۆیە دەکەن
ئامادەکردنی: #هەڵمەت بتوێنی#
بەڕێوەبەرى شوێنەوارى کۆیە ئاشکراى کرد، کە بنەماڵەى مەسعود محەمەد، ڕووناکبیر و نووسەرى دیارى کورد، خانووە کەلەپوورییەکەیان پێشکەشى شوێنەوار کردووە و بەو هۆیەوە دەتوانن کارى نۆەژنکردنەوەى بۆ بکەن.
#یەکێتىی واحید#، بەڕێوەبەرى شوێنەوارى کۆیە، بە (باسکورد) ى ڕاگەیاند: لە سنوورى ناو شارى کۆیە، چوار گەڕەکى کۆنی کەلەپووریى هەن، بەڵام بەهۆى ئەوەى موڵکى شوێنەوار نین، ناتوانین خانووەکانیان نۆژەن بکەینەوە.
وتیشى: تا ئێستا سێ لە خاوەنى خانووەکان، خانووەکانیان پێشکەشى فەرمانگەکەمان کردووە، چوارەمیشیان بنەماڵەى مەسعود محەمەدە، کە کوڕى مەلاى گەورەى کۆیەیە، خانووەکەیان پێشکەشى فەرمانگەکەمان کرد و لە چەند ڕۆژى داهاتوودا کارى تاپۆکردنى لەسەر شوێنەوار بۆ دەکەین و دەیخەینە ناو بەرنامەى نۆژەنکردنەوە و کردنى بە شوێنێکى کەلەپوورى.
باسى لەوەش کرد: بۆ خانووى چوار گەڕەکەکەى دیکەش، هەوڵەکانى خۆمان خستووەتە گەڕ، کە بە چەند قۆناغێک بیانخەینە سەر شوێنەوار، یان خاوەنەکانیان بە دیزاینى کەلەپووورى نۆژەنیان بکەنەوە.
#مەسعود محەمەد# کوڕى مەلاى گەورەى کۆیە، ساڵى 1919ى زایینى لە شارى کۆیە لەدایک بووە، لە ساڵی 1945 خوێندنی کۆلێژی مافی لە بەغدا تەواوکردووە و دواتر لە ڕێگەى نووسین و لێکۆڵینەوەکانى بووەتە نووسەر و لێکۆڵەرەوەیەکى دیارى کورد و خاوەن ژمارەیەک پەرتووکە، هاوکات پلەکانى ئەندام و جێگر و سەرۆکى کۆڕى زانیاریى کوردى پێ دراوە و لە پەنجاکانى سەدەى ڕابردووشدا وەک نوێنەرى خەڵکى کۆیە، لە پەڕڵەمانى ئەوکاتى ئێراق دیارى کرا و لەگەڵ چەند یاساناسێکى دیکە یاساى چاککردنى کشتوکاڵ و ئاودێرییان داڕشت و لە ساڵی 1964یشدا بەناوی بزووتنەوەی ڕزگاریخوازی #کوردستان# کرا بە شالیاری وڵات لە کابینەی (تاهیر یەحیا) ، تاکوو ساڵی 1965. ڕۆژى 1ی 4 ی 2002 لە شارى هەولێر کۆچی دوایی کرد و بۆ ڕۆژى دواتر لە گۆڕستانى دەروێش خدرى شارى کۆیە، لە تەنیشت گۆڕی مەلای گەورەی باوکیدا بە خاک سپێردرا.
جێی ئاماژەیە، مێژووی درووستکردنی خانووی مەلای گەورەی کۆیە 200 ساڵە و دەکەوێتە گەڕەکی بایزاغای شاری کۆیەوە.[1]