باخچێوە بېگەرد
نویستەی: میرزا ئۆلقاڎرو پاوەی
بەشۍ یەرەسەڎ و حۆتەمە
ساڵەی دوەمەی کۊچییەنە، جوولەکەکۍ بەنی نەزیر و بەنی قورەیزە و بەنی قەیتانی ئامێ خزمەتو پېخمئاوەری (ص) ، داواو ڕۊشنکەردەیۆ هەرمانەکېش کەردەشان، واتشان پەنە تۊ چ کارێ کەرین؟، ئینە چېشەن دەست دانەنە؟.
حەزرەت فەرماوا: کارو من پېخام ئاردەیەن، من ئا کەسەنا کە خوڎای ذولجەلال جە تەوراتەنە وەسفشکەردەنا پەی مووسای، جە ئینجیلەنە پەی عیسای، جە زەبوورەنە باسشکەردەنا، من پېخامئاوەرو ئاخرزەمانینا.
تایەفەی یەهوود جە دەوڵەت مەندان
ئەهلی مەدینە جە خود پەسەندان
خېڵی بەنی نەزیر غەتەفان ئەرجان
بەنی قورەیزە چەنی بەنی قەیتان
ڕوئەسای قەوم تایەفەی یەهوود
خودا نەشناسان ئەهلی بۍ و وجوود
یەکسەر وە هەیەجان ئیجتیماعی خاس
بەلام وە یەک شەرت ئیراد و ئیخلاس
دەردەم وە حەزرەت هجووم بەردشان
گرد وە ڕیسالەت سوئال کەردشان
واتەن: محەمەد دڵ وە ئەندېشەن
تۊ جە نبۊوەت، نیشانت چېشەن
مەخلووقات پەی چېش مەکەردی دەعوەت
کارێ بکەرە لېت نەبۊ زەحمەت
فەرماوا: بە نام پادشای ئەکبەر
بە تەسدیقی قەول فیدای پېغەممەر
خودا یەکێوەن بێ هەمتای بۍ باک
ئەشیا گرد بە حوکم ئەو مەبۊ بە خاک
ئەو کەسەم کە خوڎا وەسفم جە تەورات
کەردەن پەی مووسا جە ڕووی کائینات
وەسفم فەرماوان پادشای جەلیل
جە سوحفی تەورات زەبوور و ئینجیل
شەفاخوای ئوممەت گرد ئینس و جانم
یەقین پېغەممەر ئاخر زەمانم
عولەمای یەهوود یەکسەر مەزانان
دایېم پەی ئېوە یەکایەک وانان
وەر جە تەوەلود من وە دەهری دوون
کیتاب گرد عالەم کەردەن ڕەهنموون
جە مەککەی شەریف نمەبۊم ئارام
مەدینە مەبۊ وە جای هیجرەتگام
پەی چېش کە خاتەم پېغەممەرانم
هەم فازلتەرین گرد سەروەرانم
سوار وە وشتر کلیم پۊشانم
دایېم شیری گەرم وشتر نۊشانم
وە پاروی نانان قەناعەت داروون
بە تەنگی و عەسرەت وە شاڎ مەویاروون
نیشانەی سورخی جە هەردوو دیدەن
کارم بە میزان گرد پەسەندیدەن
موهری نبۊوەت نەسبەن جە دۊشم
پەردەی عیووبات مەردونان پۊشم
جە سایەی ئەو شای فەردی تەنیای تاک
جە شاهانی دەور هیچ نەداروون باک.[1]