سەوقاتی و دیاری
واچۍ سەوقاتی بە ماناو (دیاری) مێ. گەر جاران کەسێ دیاریێش کیاستێ پەی دۊسێش، واچېنۍ سەوقاتیش پەی کیاستەن، ئیتر یاگۍ دڵ وەشی و فەرەحیش بۍ.
شېخ عوسمان و تەوېڵۍ دیاریێ مەکیانۊ پەی مەولەوی، دیارەن شېخی سیراج الدین چا پایە گۆرەو سەنگینۆ یاڎو مەولەویش کەردەبۊوە، پەی مەولەوی گۆرەتەرین خەڵاتەن، وەشی دڵیەن، چونکم شېخی سیراجەدین مورشېدو مەولەویەن، هەر پېسە وېش واتەن.
ئاویارەکەی سەوزەی ئارەزووم
زانا بە گردین ڕازی کونەو نوم
دەماخ وە نەشئەی سەربەرزان کەیل
مورشیدی میراو سەرجوی بادەی لەیل
ئانە تاریفۍ مەولەوینی پەی شېخی، ئەی گەر شېخی سیراجەدین ڕەویەی بوزورگیش وەجا ئاردەبۊو دیاریش پەی موریدەکەیش کیاستەبۊ، ئەشۊ چېش واچۊن، دیارەن بە نامێوە مەکیانۊوە پەی شېخی ئەپی تەرزە
دەرمان زامان دەردەکەی کاریم
هامڕازی ناڵەی شەوان بېداریم
نامەو هەدییەی دوستانەت یاوا
تەصدیعت کېشا خەیلێ ماڵ ئاوا
ڕەویەی بوزورگیت وە جا ئاوەردەن
غەریب نەوازیت وە پیشە کەردەن
وەرنە ئیسە من هوون دڵ وەردە
قامەت سەنگی بار خەمان خەم کەردە
دەروون وە مەودای دووریت بېیەن ڕېش
هەی خاکم وەسەر سەوقاتم پەی چېش
دمای چن ساڵێ جە کوچی دمایېنو مەولەوی، میرزا ئولقادرو پاوەی چەنی دوسێش نامەکەو مەولەوی وەیاڎ مارۊوەو پەی دوسەکەیش مەنویسۊ کە شیرینی لاو منۆ، ئامای نامەی تۊن:
نوقڵ و شیرینیم نەقڵ نامەی تۊن
هەدیەو بەراتم ڕېزەی خامەی تۊن
باقی تەعاروف ڕەسمی زیادەن
ئیسرافی مەعرووف لوقمەی بۍ دادەن
فەرموودەی مەعدوم سەرای خاک ماوان
دەک وە ڕەحمەت بۊ چ خاس فەرماوان
دەروون وە مەودای دووریت بېیەن ڕېش
هەی خاکم وەسەر سەوقاتم پەی چېش.[1]