باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و هەشتا و یەکەمە
دمای هاگاڎاری قوڕەیشیەکا پەی عەرەبە عەشایېرەکا، کە واتشان هەرکەسێ محەمەد یان یاوەرەکاش کوشۊ، خەڵات کریۊن، کابرێوە دەشتەکی بە نامۍ (سوراقە) ی سیلاحش هۊرگېرت، سوارو ئەسپەکەیش بی ڕوەو سارا جمارە پەی کوشتەی محەمەدی و یاوەرەکاش، وەڵۍ ئانەی نزیک بۊوە جە حەزرەتی ئەسپەکەش سەرسمش داو کۆت.
زەرە داوەرێ وەتەن بەستەوە
نیزە دڵ پەیکەر گرت وە دەستەوە
ڕەخت و ڕووی مەساف یەکسەر کەرد نە وەر
سیلاحش پۊشا جە پا تا وە سەر
فەرما تا ئەسپش زین کەردەن وە جەخت
سوار بیی دەرلاد دېوی ناشونەخت
ڕوو کەرد نە ساحیل بەوری بۍ نەزیر
ئەسپش جە عەرەق سیابیی چوون قیر
یاوان وە جایێ چوون عەلەم داران
دیاردا حەزرەت ماباقی یاران
بەڵۍ یەک قانوون قەدیمی ڕوژگار
هەرمەندەبۍ پەی ئەوان یادگار
سێ دانە خەدەنگ چۊی تیر ماوەردەن
پەرێ تەفائول مەرقووم مەکەردەن
ئەمر فی ڕەببی وە چۊی ئەوەڵ تیر
نیهانی ڕەببی دوەم چوون خەمیر
سێهەم پەی مەرقووم چوون لەوحی سادە
هیچ نەنویستەن کەم یا زیادە
مەوستەن وە تۊی تای جوعبەی تەرکش
پەی ئەهلی نیاز وە بۍ غەل و غەش
هەرکەس نیازێ دارۊ نە دەروون
دەس مەوەر تیری ماوەرد وە بەیروون
ئەر خەدەنگ ئەمر ماما وە دەستش
دەردەم پەی مەقسوود کەمەر مەبەستش
ئەر سەهمی ماما جە تەرکش وە دەر
سەودای ئەو مەتڵەب بەر مەکەرد وە بەر
ئەر تیر پەی خەت بویناش وە چەم
تەفائول مەکەرد دیسان جە نۊ هەم
سوراقە جەودەم چوون بادی باران
یاوا وە نزدیک موستەفا و یاران
ناگاە جە تەقدیر ڕب العالمین
ئەسپش سەرسم دا وېش کەوت وە زەمین
دەس بەرد ئەو تەرکش تیرێ بەرئاوەرد
تەماشای تەحریر خەتتی خەدەنگ کەرد
واتش: ئەر ئارۊ وە بۍ چەند و چوون
محەمەد وە دەس من مەبۊ نگوون.[1]