باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و سیهەمە
حەزرەت چەنی جوبرەئیلی یاوێ چەرخو حۆتەمی، چاگە یاوێ بە دیڎارو حەزرەتو ئیبراهیمی، دمای ئەشناسای، چاگەیچ گوزەرشان کەرد تا یاوێ بە سەدرولمونتەهای، کە یاگۍ حەزرەتو جوبرەئیلی بۍ.
سەماوات تەیی کەرد هەر شش وە بېخەم
تا یاوا بە تاق گەزدوونی هەفتەم
جەو دما مووسا جە دەرگای باریی
دەمدەم مەناڵا مەکەردش زاریی
مەلایەکان وات: دڵ وە ئەندېشەن
یا مووسا سەبەب زاریی تۊ چېشەن
واتش: جوانی تازەی پەنەیاوا
زەمین تاکە عەرش بەو مەبۊ ئاوا
نامی ئوممەتش گرد نە دەفتەرەن
یەقین جە ئوممەت من زیاڎتەرەن
ئەغڵەب گرد ڕەوزەی ڕیزوان جاشانەن
جەڼاتی تەجری مەنزڵگاشانەن
بەڵام ئەو زاری چە حەسەد نەبۍ
زاهیر جە ئەقەل قەومی وېش مەبۍ
حەزرەت جە گەردوون ئەفلاکی حەفتەم
چونکە ئیبراهیم خەلیل دیی وە چەم
هەم بە ئیشارە ئەخی جوبرەئیل
حەزرەت کەرد سڵام بە تاو و تەعجیل
ئیبراهیم واتش: مەرحەبا سەڎ جار
فرزەندی ساڵح سەیدەلئەبرار
حەزرەت گوزەرکەرد، جە بەیتەلمەعموور
سوجدەگای مەلیک سەرتاپا جە نوور
جوبرەئیل یەکیەک ڕەهنموون کەردش
تەشریف بە سەدرولمونتەها بەردش
سەدرە یەک درەخت جای جوبرەئیل بۍ
وەڵگی ئەو درەخت چوون گۊشی فیل بۍ
ئەشجارش وېنەی شاخی حەبەر بۍ
جە تووبای بەهەشت ئەو بڵندتەر بۍ
جە بېخش چوار جۊی ئاو ڕەوان
شەوان تا بە ڕۊ دایربین دەوان
دووشان پەنهان بین دوو جوشان زاهیر
زەلالی شیرین بۍ عەیبی تاهیر
ئیستیفارش کەرد جە ڕوحەلئەمین
پەی ئەو چوار نەهر ئاڵای بۍ قەرین
جوبرەئیل عەرز کەرد یا ڕەسولوڵڵا
وات: ئەو چوار جۊ، بە ئەمری ئەڵڵا
ئەو ڕۊ نیهانی مەشان وە بەهەشت
پەی حەوزی حەیات پەی سەفا و گوڵگەشت
ئەو دوو زاهیرە کەسیر و قەلیل
یەکێ فوراتەن یەکێشان هەم نیل
دونیاشان مەعلووم بۊ وە تۊ
عەرزم هەر ئېدەن جەسارەت مەبۊ.[1]