باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و حەفتا و هەشتەمە
وەلید، وەردەمو پېخامئاوەرینە بۍ دەسەڵات مەند، پەوکەی گېڵاوە پەی یانەو وېشان. ئەبوجەهل چەنی قوڕەیشیەکا وېشا یاونا یانەو (وەلید) ی، ئەبوجەهل و وەلید کەوتۍ گفتوگۊ
بۍ دەنگ ئاخېز کەرد شیی وە یانەی وېش
نەشیی وە مەجلیس قەومی کېنەکېش
قەومی قوڕەیش گرد هجووم کەردشان
وە لای ئەبوجەهل هانا بەردشان
گردین واتشان: یا ابا الحکم
سیلسیلەی قوڕەیش جیابی جەهەم
عەمووت وە لامان تەشریف ئاوەردەن
دینی محەمەد ئیختیار کەردەن
دەردەم ئەو لەعین چەنی چن پلید
پەی تەکەللومش وە یانەی وەلید
واتش: ئەی عەمو ئینە چە حاڵەن
قەتڵت واجیبەن ماڵت حەڵاڵەن
دینی محەمەد ئیختیار کەردی
وېت وە دەستی وېت وە دوزەخ بەردی
وەلید دا جواب، سەوگەند مەدەر پېم
من هەر هام وە کیش جەدد و ئابای وېم
لاکین کەلامی سەعبم شنەفتەن
ئارۊ دندانم گرد جە دەم کەفتەن
چوون من کەلامم بۍ حیساب دییەن
مەعلووم ئەی کەلام زی بەشەر نېیەن
ئەبوجەهل وات: مەر شیعر و نەزمەن
واتش: نە نەزمەن نە بەزمو ڕەزمەن
ئەبوجەهل وات: چوون ساحیب ڕەتبەن
کەلامی وەی تەور ئەگەر هەن خوتبەن
وەلید وات: نەخێر من گوشم دەردەن
جە عەقڵی بەشەر گوزەر نەکەردەن
خوتبەی کەلامی موتتەسیل دوورەن
ئەو خۊ کەلامی ئەعلا مەنشوورەن
بەعزێ بە بەعزێ تەشبیە نەدارۊ
ئایات وە ئایات نوور لېش مەوارۊ
ئەبوجەهل وات: چە عەلامەتەن
سیحر و جادوەن یا کەهانەتەن
واتش: نە سیحرەن نە جادوو ئەفسوون
نە کەهانەتەن نە عیلم نە فنوون
ئەبو جەهل وات: ئاخر سا چېشەن
من جەی کەلامە دەروونم ڕېشەن
واتش: سەبر کەر تا فیکرێ کەروون
بەل ڕیشەی مەتڵەب جە بېخ باوەروون.[1]