#میرزای لوڕستانی#
مەئزۇن دا ئەمیر خاتۇنی دڵبەر
مېن-بەعد ڕەھا بەر نە ڕۇی دەشت و دەر
ھەر تەعامێ ھەن وېت درۊست بکەر
قەبۇڵ نەدارۇن خەلەل دۊ ئەسەر
خاتۇن وات بەڵۍ میری تەمیزم
جە کەنیزەکان کەمتەر کەنیزم
بشنەو داستانی عەجایېب دڵگیر
نېشتەبۍ ئەمیر ماتەم و زویر
ڕۇکەرد وە عەفۇ، چەکۊی بەرادەر
ئېم ڕۊ کۊی غەمان وە نەم دان ئەسەر
ئەو تەخت و نەردە باوەر بە دڵواز
بشانیم نەردێ نەی چەرخ کەچباز
ئاوەردن نېشتن ھەر سێ بە ڕازی
نېیاشان بەنای کاری نەردبازی
چەند ئۊین جە بەین ھەر سێشان وېیەرد
جە ناگاه بە ئەمر تاک تەنیای فەرد
خاتۇنی شیرین جەمین بۊی گوڵاب
ئاما چۇن خورشید بەسەر چەشمەی ئاب
سەر تا پا لېباس ئاڵای زەڕوەرەق
خورشید جە نۇرش ھۊرگېرتەن ڕەونەق
نازک و نازدار پەریزادەیێ
جە نەسڵ پەری پاک ئوفتادەیێ
باڵا بوڵەندێ عەرعەر ئەندامێ
قەمەر ڕوخسارێ، ماھی تەمامێ
دۇ چەشمان سېیا عەمبەرین مۇیێ
لۇل وەردە حەیان ئەفعی گیسۇیێ
ئافەتی دەوران کەمان ئەبرۇیێ
وەیکەری وەیباز وەی وەھەر سۇیێ
خۇنخوار و بېڕەحم خودا نەترسێ
مەغرۇر و مەدھۊش ئەحواڵ نەپرسێ
مەکەر پەی قېتال وەرینان مەستێ
تیری غەمزە و ناز دایېم نە شەستێ
سەر تا پا بە نۇر قودرەتی سرۇشتەن
باڵا وېنەی حۇر باغی وەھەشتەن
شەوقش وېنەی ماه دۇ ھەفتەمینەن
ڕەویڵەی ڕەمکېش نازداری چینەن
کورپە حەیی تاران سېیاه سەعبانی
کەردن سەراوېز تەختی پېشانی
جا گېرتەن نە پای عەرەقچینەوە
جەواھر نیشان بەھای چینەوە
پەی بېداری زوڵف سېیای چین چینش
پەی پەی مەبۊسان لەعلی ماچینش
ئەبرۊ چۇن کەمان گۊرگیری بەھرام
یان بەدری هیلال یەک شەوەی تەمام
نەققاشی قودرەت دۇ عەین کەردەن مەشق
بېیەن وە سەرمەشق عاشقانی عەشق
ئاھۇی تەتارانی خۊش چەریدە
وەلەدەی جەیران سا پەروەریدە
دەم دوڕج یاقۇت کەیلەن جە گەوھەر
پەروەردەن بە ناز چۇن شەھد و شەکەر
دۇ دەستەی کەڵاف مېقرازی کەردن
وە بان گۊناش چین چین چین وەردن
بەو تەور ناکەسەن وەقتی عېبادەت
لەعلی بەدرەخشان مەڎۊ بەغارەت
شۊعای زەنەقدان مەدەرەوشۊ جە دۇر
ماچی کۊی بلۇر، یاخۊ دەریای نۇر
[1]