باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و هەشتەمە

قافڵە، کەوت ڕا پەی شامی، قافڵەو ئی جارەیە فرە جیاوازەن، سەنگینەن، چونکم فەخروو کائیناتیش چەنین، وەختێ قافڵەکە یاوا نزیکو وەڵاتو(میسر)ی، ڕاهیبێ بە نامۍ(بەخېرا)ی ئاما سەرو ڕێشا، بەخېرا شارەزاو تەورات و ئینجیلی بۍ، شارەزاو دینە وەڵینەکا بۍ، پەوکەی گومانش کەرد جە قافڵەکەی و یاوانە کە:
قافڵەی سەنگین، ئاڵای خۊش تەرغیب
یاوان، بە شەش، میل بە میسری قەریب
نەوجا، یەک شەخس، عالی مەقامێ
ڕاهیب عەجیب، (بەخېرا)، نامێ
یەک سەومەعەی خاس، بەرزی، دیاری
قەرار دابۍ پەی، تاعەت گوزاری
سیفاتی حەزرەت، یەکیەک، مەزانا
دایېم پەی مەردووم، بەحسش، مەوانا
بە عیلمی تەورات، زەبوور و ئینجیل
هەم بە چن مەکتوب، بورهان و دەلیل
مەزانا، ئەو شاه، شېوە شیرینە
قەدەم، ماوەرۊ، بەو سەر زەمینە
هەر جاه ڕاهیی بۍ، تەمام، ئەعزەم بۍ
جە لای (بەخېرا)، جەرگشان، جەم بۍ
ئەو ڕۊ، (بەخېرا)، وېش شیی وە باڵا
قەدەم بەرد، وە بان، سەومەعە ئاڵا
خەیلێ نیگاه کەرد، بەو دەشت و دەردا
وە ڕاه ویاران، وە گرد گوزەردا
دیش، یەک قافڵە، سەنگین دیارەن
گرد ساحیب بوراق، ئوشتر سوارەن
گرد عەرەب سوار، ئەربابی دەوڵەت
گرد مەردی مەعقوول، ئەهلی مشوورەت
گەرمای تابستان، بەڕڕی تووناوتوون
جۊشی ئافتاب، شەرارەی سەبوون
حەرارەی تابش، بڎۊ، وە هەر کەس
دەر لا، مەکەردش، وە سفتە قەقنەس
یەک لەکە، ئەبرێ(هەورێ)، وە سەڎ جەهد و جەخت
مەگېڵا، چەنی قافڵەی خۊشبەخت
هەر پا ئەڼازە، جە ڕووی هەواوە
چەنی کاروان، مەشیی، بە ڕاوە
تا کە، قافڵە، وە نزدیک یاوا
سەدای، دوڕ و سەنگ، ئەو زېد و ماوا
هەرکامێ پەی وېش، وە لەبەیک لەبەیک
مەوات: یا ڕەسوول، سەلام و عەلەیک
بەخېرا)، جەی سڕ خەیلێ عەجیب مەند)
حەرفش، نە دەهان، یەکسەر، شیی وە بەند
شەخسێ، جەو دما، ئاوەرد، ئەو نەزەر
مەوسووف، جە ئەوساف، خاتەم پېخامبەر
شەجەر وە حەجەر، خاک وە ئاب و باد
سوجدە، مەبەردەن، گرد، بە خاتر شاد
وەحشیات، مامان، گرد وە ئەقدامش
هەرکامێ پەی وېش، مەکەرد سڵامش
بەخېرا)، زانا، فەوریی، کە وېشەن)
نیشانەی، فەخری مورسەلین پېشەن.[1]