باخچێوە بېگەرد
نویستەی: میرزا ئۆلقاڎرو پاوەی
بەشۍ: حەفتا و نۊهەمە
عەبدولموتەلیب، باباو پېخامئاوەرو ئیسلامی، تەمامو مونەجېمەکا (هەسارەزانەکۍ)ش، بەردێ پەی یانەو وېشا، هەواڵو دماڕۊو محەمەڎیش وەنە پەرسێ.
عەبدولموتەلیب، یەک ڕۊ، بۍ ئەندېش
مونەجیمان گرد، بەرد وە حوجرەی وېش
کەوکەب ژماران، کەردشان حیساب
دڵ دان، بە نجووم، زیکری ئیسترلاب
ئیسمش (محەمەد) ، چەنی مەولوودش
بەختی هومایۆن، بینای وجوودش
مدران موتەفیق هەر هەشت، جە یەک تاق
جە خانەی میزان، پەی سەیری ئافاق
جە ئەهلی ڕیاز، تەنسیق تەرقیم
دانای دەقایېق، گویندەی تەقویم
جە دمای تەحقیق، مەسئەلەی موشکیڵ
تەسدیقی کووللی کەردشان، حاسڵ
واتشان، تالېع، ئەو تیفڵی سەروەر
تەمام فەرخەندەن، بەرزەن مونەوەر
چونکوم، جە بیستەم دەرەجەی جەددیی
ئیتیفاق کەوتەن، نەجمی ئەحمەدیی
دینی قەدیمش، جە نۊ عایدەن
یەومەن، فە یەومەن، وەزیر هەر ئېدەن
نیشانەی سەعید، ئەو نیکو ئەختەر
تالعش، میزان، مەولوودش قەمەر
مەرتەبەی عالیش، خەیلێ عەزیمەن
تا ڕووی قیامەت، هەر موستەقیمەن
بە دەلیلی شەمس، زەهرەی عەتارد
هەرسێشان، وە بورج عەقرەب، بین وارد
دایېمەن، تالع، ئەو شای تینەت پاک
خاتیب جە دەنگ، خیتابی لەولاک
کەوکەب شوماران، دەنەندەی ئەخبار
عەبدولموتەلیب، کەردەن، خەبەردار
واتشان: فەرزەند، ئەرجمەندی تۊ
فەرمان، فەرمای دەور، دەهری دوون مەبۊ
بە حوکمی بېچوون، لوتفی ئیلاهیی
ڕەفیقش نېیەن، جە ماه، تا ماهیی
موڵکی نەردەبان، فەلەک بەندەشەن
شەهەنشاهان، گرد سەر ئەفکەندەشەن
ئەهلی جڼ و ئینس، مەخلووقات یەکسەر
وەحشی و تیوور، جوملەی زی بەشەر
گرد مەحکەم، ئەمری کەس نەدارشەن
موتیعی ئایین، خریدارشەن
هەرکەس، جە فەرمان، ئەمری ئەو سەروەر
جە بەڎبەختی بەخت، پا بنیۊ وە بەر
نەکەرۊ، حەڵقەی، غوڵامیش نە گۊش
جە فەرموودەی ئەو، ببۊ فەرامۊش
بە تېغی قەهرش، سەرنگوون مەبۊ
ئەرواش، وە دوزەخ، تووناوتوون مەبۊ
جە بابا ئاڎەم، تا عیسای مەریەم
ئەنبیاهان گرد، تەمام وە سەرجەم
گرد جە یەک میزان، ترازووی قەدەر
ئەوان گرد چیسەر، محەمەد چەوسەر
حەق مەحبووبێ تەر، جە حەبیبی وېش
خەڵقەت نەکەردەن، بینای بۍ ئەندېش
دەروونش دەریای بەحری عەمانەن
یەقین، پېخامبەر، ئاخر زەمانەن.[1]