ئیبتیدا بە ئیسم پادشای ئەعزەم
خەللاق و ڕەززاق عالەم و ئادەم
قەدیم و قەییووم زات «ذوالجلال»
مەعدووم ئەفکار مەوجوود جە هەر حال
«شديد العقاب، ستار العيوب»
کەريم و ڕەحيم «غفار الذنوب»
قادر قودرەت «الله الصمد»
سەنعەت نومای کەون ئەزەل تا ئەبەد
مەعرووف سیفات موزهیر مەعنی
تەجەللای زاتت جە دارەین غەنی
جە عەیب و عیللەت مانیع بێباکی
نابینای دیدەی عەقڵ ئیدراکی
مەعکووسەن کەونەین جە زیای زاتت
ئەزەل تا ئەبەد نوور سیفاتت
جە وەحید زات کروور سیفات
قەدەر کەرد قەلەم قەزای مەوجوودات
حووت و حەرەکە، وەحش و ئینس و جان
یاجووج و تویوور، جەحیم و جینان
مەوجوودەن یەکسەر جە نەشئەی سیفات
جوملە گەواهەن پەی وجوود زات
زەمین و زەمان، سەما هەفت تەبەق
سازنای جە دوڕڕ قودرەت موعەللەق
زات بێزەرفت زەرف سیفاتەن
ئیجاد کونندەی ئەشیا و نەباتەن
سیفاتت کەونین هەم لامەکانی
جە تەحت و جە فەوق پەیدا و پەنهانی
موزەییەن جە تۆ هەفت تەبەق سەما
کورسی و عەرش و فەرش تا «تحت الثری»
مەشعەل نومای شەمس زیا و نار و نوور
زوڵمەت نومای ئەبر شەبان دەیجوور
بەعد مەوت مەحیا کونندەی نەبات
ئەموات بەخش ڕووح زومرەی «ذی حياة»
موجەوهەر زیهن زەمیر عالەم
نە جوود «الست» تا نەفخ عەدەم
بە فیقﮪ و بەدیع، کەلام و هەیئەت
نەیاوان بە کونﮪ زات بێمیننەت
جوملە ئەنبیا و فریشتان تەمام
بەند حیرەتن یەکسەر جە ئیفهام
سیراتت چێشەن یا میزان زو چی
عەتات نە چێشەن یا خەتا زو کی
«لا يسال ذات، علي الاعلی»
هەم لایق بە تۆن هەر حەمد و سەنا
تەئەسسوف ئێدەن جە «بين العوام»
شایستەی شەئنت کەس نەکەرد تەمام
دەرک و عەقڵ و فیکر بێنوتق و ماتەن
سەرئەفگەندەی عیجز حەمد و سەناتەن
چارە هەر ئێدەن پەرێ عەبد زار
گوشاد کەر زوبان پەرێ ئیستیغفار
یاحەق ئەر گونام بێحەدەن، بێشوو
جە کۆﮪ عەفووت مەنمانۆ بە موو
ئەر ڕووسیاهم سکەم سفیدەن
جە تەهلوکەی بیم بە تۆم ئومیدەن
بە «لا تقنطوا من ڕحمة الله»
باقییەن یەقین «آمنت بالله»
یە بەشارەتەن جیهان ئافەرین!
بە عەفووی گونای زومرەی موزنیبین
ببەخشا گونام مەندەنان زەلیل
مووەففەقم کەر بە تەوبەی تەعجیل
«فەقێ» لاڵیات نمەبۆ تەمام
بەر موحەممەد بۆ سەلات و سەلام
#فەقێ قادری هەمەوەند# [1]