«فەقێ» نەی جادا بکەر موناجات
بناڵ نە دەرگای «قاضي الحاجات»
یا حەی بە حورمەت ئەو وەقت و سەعات
بەندەی پڕ گوناﮪ بدەری نەجات
هەم کودروون زەنب بارەن بە گەردەن
هەم شەرمەساریم جە حەد ویەردەن
هەم غوفران زەنب هەم عەتای ئیمان
هەم ڕەهاییی بەند نەی چاﮪ زیندان
بەشق زات وێت ڕەئووف لەتیف
هەر سێ عەتاکەر بەی بەندەی زەعیف
یاڕەبی! ئەنوار دروود بێ حیساب
بەر موحەممەد بۆ و بەر ئال و ئەسحاب
بە حورمەت نوور شاهید و شەفیع
هەم بەر ئێمە بۆ کێشانم تەسدیع
سا دوعای نەبی یاوا بە خیتام
سوار بی سەیید بێ سەبر و ئارام
جە توندیی بوراق قووەی پەڕ و باڵ
ئەسەد بی زوهرە سونبولە پاماڵ
تلووع کەرد کەوکەب نەجییو سەفی
عەتارید سەرسام سەرەتان خەفی
جەوزا موشتەریی نوور جەمالەن
دەلو نە حەسرەت ئاب ویسالەن
میڕڕیخ نە عەقرەب زوحەل زەبوون بی
جەدی و فەرقەدان کەیوان نگوون بی
چون تەرکەش نە قەوس قەزا و قەدەر بی
زوو زەنەب بەستەی مێخ خەتەر بی
سەور نە سەمەک ماند بەڕڕە بوریان بی
بەهرام نە میزان شەعرا حەیران بی
سورەییا مەسرووع سوهەیل بی غرووب
موختەل بی بەنات نەعش نە پاکووب
بوراق بە قووەی جەناح دا نەهیب
مەﮪ کەرد وە پاناڵ خورشید بە ڕکیب
سەر تەوق عەلەم سیلسیلەی خاتەم
جە شەشەم گوزەشت سەردا نە هەفتەم
جە سەرای هەفتەم بە ئەمر قودرەت
شەمس نبووەت بەردن پەی جەننەت
جە سەحرای مەحشەر میزان و حیساب
گوزەشت جە دۆزەخ سیرات بە شیتاب
نەهران و حەوزان جەننات و قوسوور
کورسی خەیمەگاﮪ خیابان و حوور
تەحت و فەوقانی هەشت قیتعەی بەهەشت
تووبای سەمەری یەکسەر کەرد گوڵ گەشت
حاسڵ بی بەرزەخ بە عیلم لە دون
«ما تشتهي النفس، تلذ الاعين»
#فەقێ قادری هەمەوەند# [1]