داستانۊ شېخی سەنعانی
بەشۊ ویسەمۍ
تەرسای گاۋرە فرە بە وەفا بۍ، کە زاناش شېخی سەنعان وازش جە ئایینەکەو ئاڎۍ ئاردەن و پەی سەرو ئایینو ئیسلامی گېڵانۆ، واتش: شېخی سەنعان بەخاترەو عەشقو من جە گرڎ چېوێ وېش وازش ئارد، پەی من شەرابش واردۆ، بتش پەرسان، خووگش وەیکەرد، منیچ شۊنەو ئاڎیی مەگنوو و جە دینو عیسای وازماروون. ئېمە ئیتر جە عەشقێ مەجازیۆ ملمۍ پەی عەشقێ هەقیقی، شېخی سەنعان تاکوو لەزەتش جە عەشقی مەجازی من نەبەرد، نەیاوا بە لەزەتو عەشقی هەقیقی، کە عەشقو زاتو هەقیەن.
شېی نە ڕاگەی هە قق، چوون نەبېش عیلاج
مەشوون وە دماش، بېزارم جە خاچ
من جە بتخانەی کۊسان وېیەردم
ڕوو نە ئاستانەی، خوداوەند کەردم
بەڵکم بەحاجەت ڕەسوولی سەروەر
عەفووم بکەرۊ، خوڎای بانیسەر
مەعبوود ئەو کەسەن، گومکەردە ڕاهێ
ببەخشۊ گونام، لوتفی ئەڵڵاهێ
بت_پارە چوون سەنگ، چېشش مێ جە دەست
سەڎ نەعلەت بە دین تەرسای بتپەرەست
مەشوون با بەسەر سەرچەشمەی زەمزەم
بەڵکو چەنی ئەو بیاوین بە هەم
ئېد وات و خېزا، وېنەی سەوڵی تەڕ
ڕوو نېیا بە ڕا، بېیابانی بەڕ
دایە و کەشیشان، کەفتەن وە دماش
وە ئەعزازەوە مەکەردەن مەناش
دایە وات پەنەش، ئەی ماهی تابان
ئینە چە فېکرەن، بەخاتر یاوان
مەر دینی عیسا، وەر مەدەی جە دەس
مەشی وە ڕاگەی دینی هەقپەرەس
عەیبەن پەرێی تۊ هومەیلای پەریی
پەرێ ڕاگەی هەقق، جە دین مەوېیەریی
ئەرێ نەونەمام، نازداری باوان
مەر خۊفت نېیەن، تۊ جە بتخانان
مەر نمەتەرسی، تۊ جە کڵېسا
بەر مەشی جە دین ئەنفاسی عیسا
مەگەر فەرامۊش، شیری سفیدم
هەنیی، کۍ بەیۊ، بە جای ئومېدم
ڕەنجی چن ساڵەم مەدەرە وە باد
هەقەسای مادەر، باوەرە، بە یاد
واتش بە دایە: وەس دەر ئازارم
جە دینی تەرسا، خەیلێ بېزارم.
[1]