داستانۊ شېخی سەنعانی
بەشۍ ششەمە
شېخی سەنعان دمای هەڕەشەکا (تەرسا)ی گاۋرۍ، وازش نارد و ماچۊ: ئەی تەرسای باڎەنۊش، من تازە گیرۊڎەو عەشقو تۊنا، من ڕاسەن پیرەنا، بەڵام گەر تاییێ جە زوڵفانی عەنبەربۊت ۋزی نە گەردەنم، عومری ۋیەردەم تازە مەبۊوە، بەڵکم جە بۊی ئەو زوڵفان کە بۊندارېنۍ بە باخو سینەیت، ئاهێم گنۊنە. تەرسای گاۋرە سوورەنە سەرو ڕازیکەردەی سەنعانی بە گېڵایۆش پەی ئەقڵ و هۊشی، بەڵام شېخی پیر ئامەڎەن ببۊ وە سەرگەرد(بت و بتخانە).
سەنعان ئېد ئەژنی، دڵ ئاوەرد بە جۊش
واتش: ئەی تەرسا، مەستی بادەنۊش
تانە مەدە لېم، سککەم سفیدەن
ئەر سەد سفیدەن، بە تۊم، ئومېدەن
تایە، جە کەلان، سیای ئەشەد بۊت
پەروەردەی سۊسەن، پای توغرای لیمۊت
ۋزی نە گەردەن، عومری ویەردەم
تەجدید بۊ، پەی دەفع هووناوان وەردەم
بەڵکم، جە بۊی زوڵف عەنبەربۊی دولبەر
تافی جوانیم، باوەرۊ ئەو، بەر
بەڵکم عیشقی تۊم، جوان کەردەبۊ
شەرابی عېشقت، پەنەم وەردەبۊ
واتش: مەواچوو، بڕېژان هوونت
جەی زەید، کەران، ئاوارەی توونت
سەنعان وات: پەی تۊ ۋیەردەم جە گیان
جە کەعبەی شەریف، ئامام پەی مەکان
ڕازیم بە مەردەن، نەک ئی ژیانە
هەردەم، مەدەی لېم سەڎ تیر و تانە
عېشقی تۊ بېیەن، وە پاپېچی پام
خورد و خاو یەکسەر، لېم بېیەن حەرام
پەی چېش ڕیسوایی مەکەری پەی وېت
عالەم گرد زانا، سەنعان بېیەن شېت
ئەوسا، من کەفتم بەی ماجەراوە
چاوی ڕیسواییم شېی، بە دماوە
ئەو ڕۊ من ئامام، جە یانەی ئەڵڵا
تەپڵی بەڎنامیم، نە عالەم ژنیا
هۊرگېڵایم نېیەن، من جەی مەکانە
مەبوو وەسەرگەرد، بت و بتخانە.
[1]