دلۆڤان هالۆ / زاخۆ
ڕۆژانە د تۆڕێن جڤاکی دا ب سەدەهان تێکستێن ئەدەبی دهێنە بەلاڤکرن، زۆربەیا وان تێکستان ژی یێن نڤیسەرێن بیانی نە. بێ گۆمان ئەڤ چەندە گەلەک باشترە ژ بەلاڤکرنا تشتێن بێ مفا، چونکە گەلەک جاران خواندنا تێکستەکێ هزرا مرۆڤی دەربارەی بابەتەکێ دیار کری د گۆهۆڕیت، یان ژی دبیتە زانیاریەک کو مرۆڤ ل داهاتی مفایی ژێ وەرگریت. یان ژی هەر چ نەبیت مرۆڤ چێژەکا ئەدەبی ژ خواندنا وان تێکستان وەردگریت.
لێ یا جهێ مخابنیێ ئەوە کو زۆربەیا وان تێکستان یێن نڤیسەرێن بیانی نە، ئانکو تێکستێن نڤیسەرێن کورد گەلەک کێم د تۆڕێن جڤاکی دا دهێنە بەلاڤکرن. ئەوێن بەلاڤ ژی دبن ئاماژە ب ناڤێ نڤیسەرێ تێکستێ ناهێتە دان. پسیار ل ڤێرێ ئەوە کو بۆچی دەمێ کەسەک تێکستەکا بیانی بەلاڤ دکەت ب شانازی ڤە ئاماژەیێ ب ناڤێ نڤیسەری دکەت .؟! لێ دەمێ کەسەک تێکستەکا نڤیسەرەکێ کورد بەلاڤ دکەت، ئاماژەیێ ب ناڤێ نڤیسەری ناکەت. ؟! یان ژی ل شوینا ناڤێ نڤیسەری دێ نڤیسیت ئەڤ تێکستە ڤەگۆهاستیە ئانکو یا ژ پەرتووکا وی یان ژ فێسبۆک یان ژ ئێنستگرامێ نڤیسەری وەرگرتی لێ ناڤێ وی نە نڤیسییە. ئەرێ مادەم ئه و تێکستە ب دلێ وی کەسی بوو و ل ئاستێ بەلاڤکرنێ دیت، بۆچی ئاماژێ ب ناڤێ نڤیسەری نادەت. ؟!
یا ژ ڤێ کەمباختر ژی ئەوە ل دەمێ کو تێکستێن نڤیسەرێن کورد ب ناڤێ نڤیسەرێن بیانی دهێنە بەلاڤکرن. من گەلەک جاران هندەک تێکست یێن دیتین کو ب ناڤێ نڤیسەرێن بیانی هاتینە بەلاڤکرن، لێ د بنیات دا ئه و تێکستە یێن نڤیسەرێن کوردن. لەوما پێدڤیە کا چاوا ئەم گرنگیێ ب تێکستێن بیانی د دەین، ئها وەسا گرنگیێ ب تێکستێن نڤیسەرێن خۆ یێن کورد ژی بدەین، چونکی بەرهەمێ نڤیسەرێن مە نە کێم ترە ژ بەرهەمێن بیانی. بەلکو ئاستێ هندەک ژ بەرهەمێن نڤیسەرێن مە گەلەک بلند ترە ژ بەرهەمێن نڤیسەرێن بیانی.[1]