منداڵ و ئافرەت لەنێو کوژراوەکاندا هەن
کوردستان تۆپبارانی تورکیا زاخۆ
K24 - هەولێر:
پەیامنێری کوردستان24 ڕایگەیاند، ژمارەی کوژراوەکانی تۆپبارانەکەی تورکیا لە سنووری زاخۆ 8 کەسە و ژمارەی بریندارەکانیش گەیشتووەتە 23 کەس.
بەگوێرەی زانیارییەکانی پەیامنێری کوردستان24 ژمارەی بریندارەکان لە بەرزبوونەوەی، هەرچەندە خەڵکی سنوورەکە هاوکاری گەشتیارانیان کردووە و بریندارەکانیان بۆ نەخۆشخانەی زاخۆ گواستووەتەوە، بەڵام بەهۆی چڕی تۆپبارانەکەوە نەتوانراوە بەهانای هەموو بریندارەکانەوە بچن، پێشبینیکراوە ژمارەی بریندارەکان زیاتر بێت.
گوهدار شیخۆ، سەرپەرشتیاری ئیدارەی سەربەخۆی زاخۆ بە کوردستان24ی ڕاگەیاند، ئه و شەڕەی لەنێوان چەکدارانی پەکەکە و سوپای تورکیا هەیە، بووەتە هۆی ئەوەی بەردەوام ناوچەکە ئاڵۆزی تێدا درووست ببێت، خەڵکی ناوچەکە ناتوانن سەردانی ناوچەکانی خۆیان بکەن.
گوتیشی: ئه و تۆپبارانەی تورکیا، کە ئەوڕۆ کراوەتە سەر ناوچەی گەشتیاری گوندی پەرەخ لە سنووری ناحیەی دەرکاری سەر بە قەزای زاخۆ، بەداخەوە ژمارەیەک گەشتیاری عەرەبی ناوەڕاست و باشووری عێراق بوونەتە قوربانی و ژمارەیەک له و گەشتیارانە بەهۆی تۆپبارانەکەوە گیانیان لەدەستداوە، کە ژن و منداڵێش لەنێو کوژراوەکاندا هەن.
سەرپەرشتیاری ئیدارەی سەربەخۆی زاخۆ ئاماژەی بەوە کرد، حکومەتی هەرێمی کوردستان بەردەوام ڕاگەیاندووە، ئه و ناوچەیە ناوچەیەکی گەشتیارییە و خەڵکی بۆ حەسانەوە دێنە ئه و ناوچەیە، ئەوەی ئەوڕۆش ڕوویداوە، کارێکی دژمنکارانەیە و بەداخەوە خەڵێکیک زۆر بوونەتە قوربانی.[1]