پرسنامە وەبوونی کووچ دۊیایی مامۆستا #پەرتەوی کرماشانی#
وە ناو خودای گەورە و مێهرەبان
نەتەوەی کورد وەگشتی لە رۆژهەڵات داگیرکرایا، وەتایوەت لە باشوور رۆژهەڵات نیشتمان و کۆمەڵگای ئەدەب و وێژەی کوردیی، وە مەرگ شاعر هەڵکەفتە و شەیدای کوردستان:مامۆستا عەلی ئەشرەف نەوبەتی «پەرتەو کرماشانی»، تۊش خەسار گەورەیگ هاتن. هەڵبەت نە هەر لەوەر ئییە ک شعرەیلێ ک نۊسیاد وە دڵ و هەست خەڵک بۊن، بەڵکم لە وەر ئەوە ک پەرتەو کرماشانی کۆڵەکەیەگ بۊ لە مەیدان ڕۊەڕۊبۊنەوە و ململانی ناسنامەیی لەو مەڵوەنە.
پەرتەو کرماشانی لە هەریمێگ چاکی مەردایەتیی وەڵاوا کرد ک کاروەدەستان تاران لە دامەزراندن دەوڵەت وەناو مۆدێڕن ئێرانەو تا ئێسە، گشت پلان و پیلانگێڕی نەرم و ڕەقێگ ئەڕا ئاسمیلە کردن و داماڵین دانیشتوان و مێژوو و جوغرافیاگەی لە ناسنامەی کوردبۊنێ، گرتنەسە وەر.ئەو لە ناوچەیەگ چەک وشە و وشەی دژ دەوڵەت داگیرکەر ئێران هەڵگرت کە هاوکات مەڵەوەن سەرهەڵدان نۊسەرێ وەک «غوڵامڕەزا ڕەشیدی یاسەمی»یە. کاراکتێرێگ ک وە ڕاسپاردن و پشتیوانیی بێ درێغ حکوومەت پەهڵەوی، جوور بەشێگ لە سیاسەت وەک‌یەک‌کردنی کەلتووری و ناسنامەیی و سەرەنجام تواندنەوەی کورد لە ناسنامەی نەتەوەی سەردەست فارس، کتاو «کُرد و پیوستگی نژادی و تاریخی او» ی نۊسا.
لە کاتێکا کرماشان شار شیرینی کورد، کریاۊدە مەیدان تێکووشان دار و دەستە و ڕەوتە پانئێرانیستەگان، پەرتەو وە دوای«شامیی»یا خەسپەن قورسێ خسۊدە سەر شان خوەی. هەم بایس لە وەراوەر سیستەم ڕاگەیاندن و پەروردە و داپڵۆسین دەوڵەت داگیرکەر ئێرانی بوەسیێ و هەم وەگەرد شێواوی و شلوێی ناسنامەی خەڵکەکەی ڕۊەڕۊ بیاتاد.«پشتم لە بارێ دەرد و خەم شکیا، نییەزانم چە بکەم؛ دەردم یەسە لە ماڵی خوەم بێ خانومانم ئەرمەنی».
وەگشتی کۆڵنەدان و تێکووشانی کەلتووری و ئەدەبی پەرتەو نەمر لە ژیانێیا وەگەرد خۊن و عارەقەی پێشمەرگەکان سپای میللیی کوردستان و پارتی ئازادیی کوردستان، ئەڕا ئەڵگەردانن ناسنامەی دزریای کرماشان و ناوچەکانی باشوور ڕۆژهەڵات و شاروەدەر کردن ناسنامەی ساختەی ئێرانیی، تێکەڵ و ئاوێتەی یەکتر بۊنە.
ئێسەیش رۆح نەمرێ، ڕەسێدە ڕۆح ئەو سەردارەیلە ک لە مەیدانەیل نەبەرد و ڕۊەڕۊبۊنەوە وەگەرد داگیرکەران ئی ئاو و خاکە، سەریان دانا وەڵام ملیان لە وەراوەر دەوڵەت داگیرکەر کەج نەکرد. وشەگانیشێ ئەڕا هەمیشە وەک بەیداخ ناسنامەی کوردی و کوردستانیی کرماشان شەکیەنەو. سەرەخوەشی وە گشت کوردستان و خانوادەی پەرەتەو و خێڵ عاشقان ئەدەب و وێژەی کوردی.
سڵاو لە ناو و یاد و پەیڤەکانی پەرتەوی کرماشانی
#حسەین یەزدانپەنا#
6ی ڕێبەندانی 2721ک
#26-01-2022#ز
[1]