ئامادەبووان.. ماتەم گێڕان
خێزان وکەسوکارو خانەوادەی سەربەرزی کۆچکردوو (پڕۆفیسۆر دکتۆر عیزەددین موستەفا ڕەسوڵ) هاوڕێبازانی کۆچکردو لەکۆڕی خەبات، هاوڕێیانی ئەدیب وزانستخوازان، ئامادەبوانی بەڕێز..
وادیسان جارێکی تر لە#سلێمانی# ولەبۆنەیەکی خەمناک ولەکۆستێکی گەورەی پڕناسۆردا، مەڕاسیمی ماتەمی چلەی کۆچکردوو پڕۆفیسۆر (د. #عیزەدین مستەفا ڕەسوڵ#) کۆماندەکاتەوە.
بەڕێزان..
بەداخ وپەژارەیەکی ناخ هەژێنەوە، چل ڕۆژ لەمه و بەر، سلێمانی پایتەختی ڕۆشنبیری وشاری داهێنەری ئەدەب لەجیهاندا، کەسایەتی یەکی دیارو ئەستێرەیەکی ڕۆشنبیرو ئەدیبی تری لەدەستدا.
کۆچکردوو د. عیزەددین، گەرچی لەنەوەی بنەماڵەیەکی نیشتمان پەروەرو خاک دۆست بوو، بەڵام خودی خۆی بەتەنیا کەسایەتیییەکی بڵند بوو، لەپاڵ زانایی وداناییەکەیدا هەستی نەتەوەیی و نیشتمان پەروەری هەر لەسەرەتای لاوێتی یەوە لەناخیدا چەسپی وچەکەرەی کردبوو، تالە ژیاندا بوو بەرلەوەی مەرگ یەخەی پێ بگرێت بەدەر لەجیاوازی بیر وڕای سیاسی، بەردەوام ودانەبڕاو بوو لەبەشداریکردنی چالاکییە سیاسی یەکان و لە یەکەم خولی پەرلەمانی کوردستاندا لەسەر لیستی یەکێتی نیشتمانی کوردستان ئەندام پەرلەمان بوو.
ئەمەجگە لەوەی بەفکرو ئایدۆلۆژیاو بیرکردنەوەی مۆدێرنانە لەیەک کاتدا سیاسی وئەدیب ونووسەرو ڕۆژنامەنووس وزمان ناس ومێژوو نووس بوو.
ماتەم گێڕان..
د. عیزەدین مستەفا ڕەسوڵ، هاوکات پرۆفیسۆرو خەباتکار بۆبیرو باوەڕی مرۆڤایەتی، ئه و بیرمەندو مێژوونوس و ئەدیبێکی گەوره و سەنگین بوو، هەروەک مامۆستاو ڕاهێنەرو بەرهەم هێنی سەدان مامۆستاو خوێندکاری زانستخواز بوو بۆ مەیدانی ئەدەب و ڕووناکبیری و ناوەندەکانی پێگەیاندن و فێرکاریی خوێندن وزانکۆکان، ئەمە جگە لەوە لەدوای خۆی گەنجینەیەکی گەورەی پڕ لە سەرچاوه و ساغکردنەوەی دەوڵەمەندی زانیاری وزانستی بۆ نەوەکانی پاش خۆی جێهێشتووە کەلەداهاتوودا دەبنە پێگه و مەرجەعێکی گرنگ بۆ توێژەران وئەدیب وزمانناسان.
ئامادەبووان..
لەبیرەوەری ماتەم وچلەی ئەم ڕووناکبیرە ئەکادیمییەدا، کەلەڕیزبەندییەکانی توێژەری بواری زانستی مێژوویی وزمان وئەدەبی کوردیدا پێشڕەوبوو، مامۆستاو خاوەن قەڵەمێکی لەشێوەی خەباتگێڕی وشۆڕشگێڕیی یەکەی خۆی بەهەڵوێست بوو، بۆ داهاتووش بە زیندوویی دەمێنێتەوە.
لەم بۆنە خەمناکەداو لەم ساتەی ئێستا کە بەهۆی ناعەدالەتی لەدابەشکردنی سەروەت وسامانی نیشتمان وزیادبونی دیاردەی دزێوی گەندەڵی وخراپ بەکارهێنان و بەهەدەربردنی سامانە سروشتییەکان و فراوانبوونی بازنەی بێکاری، خراپ بوونی حاڵ وگوزەرانی هاووڵاتیان، عیراق بەگشتی بەدۆخێکی ناجێگیروئاڵۆزدا تێدەپەڕێت وناڕەزاییەکان گەشتوونەتە لووتکە ودوور نیە پڕیشکی ئه و ئاگرەی کەزیاد لەقەبارەی خۆی پەرەی سەندووە ڕوو لەگەورەبوون بنێت، بە پەیمانی یەکێتی نیشتمانی کوردستان بۆ یەکڕیزی و یەکگوتاری وهاوهەڵوێستی ویەکدەستی و ڕێکخستنەوەی نێو ماڵی گەورەی گەلی کوردستان ڕۆحی تەواوی شەهیدانی گەلی کوردستان و خەباتگێڕان وزانستخوازانی کۆچکردو لەبەرزیدا شاد دەکەین.
دووبارە بەناوی یەکێتی نیشتمانی کوردستانەوە پرسه و سەرەخۆشیمان ئاڕاستەی کەسوکارو بنەماڵە تێکۆشەرەکەیان دەکەین و بۆ ووننەکردن ودەرنەچوون لەسەر ڕێبازی سیاسی وئەدەب وڕۆشنفکری وزانستخوازی ئه و کەڵە زانایە، بێ ئاوڕدانەوە بۆ دوواوە بەرەپێش بێ ڕاوەستان هەنگاوەکانمان خێراتردەکەین.
سەربەرزو سەرکەوتوو بن..
حاکم قادرحەمەجان
ئەندامی دەستەی کاگێڕی مەکتەبی سیاسی
#یەکێتیی نیشتمانیی کوردستان#
سلێمانی
#15-11-2019#
⚠️ تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!