ئامادەکردنی: #زریان سەرچناری#
سلێمانی 2018
ڕاجی
لە خۆشی چاوەکەت دڵ کاری ناقۆڵا نەکا چ بکا؟
بە ناوی نارەوەن باڵات بە دەم سەودا نەکا چ بکا؟
لە پێ ئاهەنگی کوردانا لە مەیدانی هونەرمەندی
بە نوکی نێزەوە دڵ هەمسەری ئاڵا نەکا چ بکا؟
سەحەر پەردەی کەلادا توشی هەر کۆمەڵ ئەبێ هەرلا
لە ڕازی ڕۆژەوە سۆزی دڵان پەیدا نەکا چ بکا؟
سەری سەودازەدەم سەرتەختەیی جامی خەراباتە
کە دامێنی بەمەستی ماڵەیی سەهبا نەکا چ بکا؟
بە بەزمی بادەوە ساقی کەوای پیرانی گوڵگون کرد
کە گۆیندە چریکەی ڕوو لە عەرشی خوا نەکا چ بکا؟
لە تاریکی خەیاڵاتا نەفەوتاوم، دڵی سافم
بە نوری عیشقەوە ئەم چاوە گەر بینا نەکا چ بکا؟
لە عالەمدا هومێدی دڵ نەما بێچارە وا ماوە
لە ناو پەردەی تەوەککول خۆی ئەگەر تەنها نەکا چ بکا؟
بە شیرینی ستاندی لێوی گوڵڕوویان دڵی ئێمە
کە تاڵاوی هەموو جێگای بە جەرگیدا نەکا چ بکا؟
دڵی پڕ حەسرەتی (ڕاجی) لە کونجی سینە ناگونجێ
لە ڕێی سەرکەوتنی کوردی کە واوەیلا نەکا چ بکا؟
خودایە من لە دەردی بێ دەماغی خۆم و گەل چیبکەم؟
لە گەڵ ڕۆبینتەنی میحنەت بە شمشێرێکی کەل چیبکەم؟
کە من ئاوارەیی موڵک و وەتەن بم دەست و پێ خەستە
لە ساحێب ئەقریبا و ئەسپ و ڕەفیقی پێوپەل چیبکەم؟
وەرە ئەی نازەنینی من بە ماچی لێوەکەی ئاڵت
بەبێ تۆ غەیری داغ و دەرد دەستی خۆم لە مل چیبکەم؟
لە زنجیری فیراقت بەستەوو مات و مەلوول ماوم
لە زۆرداری جەماڵ و حیددەتی لاوی فەحل چیبکەم؟
چ ئاشوبم بەڕسوایی سەرم هێناوەتە سەر خاک
کە من خاکم لە لاله و سەبزەواتی مێرگ و مەل چیبکەم؟
بە بێ من ئەی نیگاری شۆخی سەربەستی بە عیشوه و ناز
نەبوو جارێ بفەرمووی بێ فەقەس لەم تەیری دڵ چیبکەم؟
زەمانەت دوژمنە (ڕاجی) چ تەدبیرت نییە ئەسڵەن
نییە ڕێگەی منیش وەک تۆ لەسەر ئەم داوە سڵ چیبکەم؟
[1]