باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و نەوەڎ و یەکەمە
ڕەسوول، ڕۊخسارش هۊرجەرخنا پەی(بریدە)ی، فەرماواش: تۊ کارت پەسەندەن، تۊ دمای وەفاتو من مەلی پەی شارێ جە خوراسان، شارێن کە برام(زولقەڕنەین)ی بنیاڎ نیان، نامش هورمزگانەن، جاگە پېسە چراوۍ دینو ئیسلامی پەخش کەرین. هەر پاسەبۍ، دمای زەمەنێ جە جەنگ و مەعرەکەی، فەرمایشتەکەو حەزرەتی بە ئەنجام یاوا.
حەزرەت تەوازوع مەکەردچەنیشان
وەعدەی شەفاعەت وېش مەدا پېشان
جەو دما ڕووکەرد وە لای (بریدە)
فەرما ئەی عەزیز کار پەسەندیدە
تۊ جە دمای من مەبی هەراسان
مەشیی وە شارێ، ها جە خوراسان
شاری عەجیب ڕەنگ تەمام ئابادەن
ئەخی زولقەڕنەین بیناش نیهادەن
نام و نیشانش ئەر پەرسی کامەن
مەعلووم بۊ وە تۊ (هورمزان) نامەن
تۊ مەبیی وە نوور ئەهلی مەشریق گشت
وېران مەکەی تەرح کلېسا و کەنیشت
فایز پەی ئەوان بۍ خەوف و خەتەر
یەقین تۊ مەبیی جە یەوملمەحشەر
بەڵۍ دمای چن مەعرەکەی داوا
فەرموودەی حەزرەت وە ئەنجام یاوا
باقی داستان حیکایەت دوورەن
مەتڵەب موختەسەر کۊتا زەروورەن
ئاخر جەو دەمدا بٲمرالله
جە ڕادا سەلمەی ئیبنی عەبدوڵڵا
یاوا وە حوزوور شای خەیرولئەنام
فەورەن داخڵ بیی وە دینی ئیسلام
جە توجاری شام عەودەت کەردەبۍ
چن دەوڵەت چەنی وېش ئاوەردەبۍ
وات: یا محەمەد گیانم فیدات بۊ
سەر و ماڵم گرد سەرگەردی ڕات بۊ.[1]