باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و یاڼزەهەمە
یەرە نەفەرە بەڎئەتوارەکۍ، هەواڵشادا قۆم و بېگانەی، هەر نەفەرێ بە سەنگێ (تەوەنێ) کەوتۍ سەنگواران و پېخامئاوەری، چن یاگێنە لاشەی موبارەکش زامڎارکریا.
ئەو سێ بەڎبەختە بەڎ مەزهەبانە
گاڵ دان وە زومرەی خوېش و بېگانە
هەر یەک بە سەنگێ ئەو ستەم کاران
حەزرەت کەردشان وە سەنگە واران
یەکسەر بە جارێ گرد هجووم بەردەن
ساقی تەشریفش خوون ئالوود کەردەن
چن جا فەرقی زەید شکەستەن وە هەم
ئەزلەق مەبەردەن چوون ماری ئەرقەم
فەریاد مەکەردەن: ساحرای مەجنوون
بشۊ پەرێ وېت توونا بەر وە توون
فیتنە و شەرارەت جە ئېمە لادەر
سادە لەوحیمان گرد گومڕاه مەکەر
خولاسە حەزرەت وە دڵ شکەستە
زەلیل و زگار هەم خوار و خەستە
مەحزوون و مایووس زامڎار و زایف
بەرشیی جە توردام قەبیلەی تایف
ڕوو کەرد وە باغێ تەمام ئاباد بی
جە موڵکی مەککە قەدیم ئیجاد بی
زاهیرەن ئەو باغ ئالای بۍ عەیبە
مەشهوور بی بە باغ عەتبە و شەییبە
حەزرەت بەو حاڵەت بەو جوهد و جەختێ
تەشریفی خەیر بەرد وە سای درەختێ
کۊی خەم جە خاتر شەریفش جەم بەست
لېوی پەڕەگوڵ بە مرواریی گەست
دەسی موبارەک بە دۊعا بەرز کەرد
ناڵا جە قاپی تاکی تەنیای فەرد
واتش: یاڕەببی دڵ پەڕ جە هوونم
مەعلوومەن جە لات زەعیف دەروونم
خواری مەزەللەت وەیلی توونا و توون
جە بارەگای تۊ مەرفووز مەداروون
من جە کافران نەداروون زاڵە
موهیم یەکیەکەی کەردەن حەواڵە
ئومېڎم نېیەن غەیر جە تۊ یەک کەس
پەنا هەر بە تۊن فەرد فەریاڎ ڕەس
یا خوڎای کەریم کەرەم بېشومار
من تەنها یەکێ، ئەوان سەڎ هەزار
ئەر تۊ نەکەری موشکیل گوشاییم
نمەبۊ جەی بەند هەرگیز ڕەهاییم
ئەگەر تۊ ڕازیت بەندە بەی حاڵە
بکېشوون دایېم ئەی ئاهوو ناڵە
منیچ بە زاتت ڕەزایەت داروون
تا یەومەلمەمات وە تاڵ مەویاروون.[1]