#وەلی دېوانە#
یاران کەردەن ڕېش، یاران کەردەن ڕېش
یە جەرگی منەن خاران کەردەن ڕېش
یە دیدەی منەن نۇر نەمەندەن تێش
یە زامی منەن زۊخاو مەیۊ لێش
یە دۇدی منەن دنیا گېرت نە وەر
یە سۊزی منەن سۊزان دەشت و دەر
یە ئاهی منەن وە ئاسمان یاوا
سەقفی سەراچە گەردۇن شکاوا
یە سەدای منەن نەفخی سۇر بېزان
وەختەن قېیامەت مەحشەر ئەنگېزان
یە ناڵەی منەن چۇن نەی مەڎۊ دەنگ
مەیۊ وە قانۇن مەتاونۊوە سەنگ
یە زاری منەن پۊسە زگارەن
عاڵەم جە زاری من بېقەرارەن
یە شینی منەن شەوان تا بە ڕۊ
چۇن «قەیس»ی مەجنۇن هام نە بېد و کۊ
یە وېڵی منەن جە سوب تا ئێوار
دەور مەڎۊ نە دەور سارا و سەردېیار
یە داخی منەن داخان جە داخان
داخ کەردەن لالەی هەردی ئېڵاخان
هامسەران وەختەن وادەی مەرگم بۊ
من جە دۇری دۊس گوڵگۊن بەرگم بۊ
[1]