باخچێوە بېگەرد
نویستەی: میرزا ئۆلقاڎرو پاوەی
بەشۍ سەڎ و سی و هەشتەمە
بەردەوام جوبرەئیل وەحیە نازڵە کەرۍ پەی محەمەدی، ماوەو شش ساڵا ڕەبەقی بە پەنهانی پېخامەکەیش یاونۍ بە خەڵکی
جوبرەئیل هەر ڕۊ، وەحی ئارد پەرېش
ئیزهارش مەکەرد، بە دوستانی وېش
شش ساڵی تەمام، جە مابەین وېیەرد
نبوەت، جە لای کەس ئیزهار نەکەرد
سەحیحی موسلیم، هەم، جە بوخارا
عولەمای سییەر، پەی یادگارا
شەرحی ئەحادیس، وەیتەور ئاوەردەن
ڕەوزەتولئەحباب، نەقڵشان کەردەن
سوئال کەرد حادیس، یافی بنی هیشام
واتش: یا ڕەسوول سەڎ جار فیدات بام
بە عەشقی ئەو شای بینای بۍ نیاز
وەحیی مەکتووبەن، یاخۊ، وە ئاواز
جوبرەئیل چېشەن، پەیم واچە کەم کەم
چۊنەن، بۍ جیسمەن، یاخۊ، موجەسسەم
حەزرەت، فەرماوا: یا ئیبن هیشام
ئامای جوبرەئیل، عەلەیهیسسەلام
گاهێ وېنەی وېش، گاهێ چوون بەشەر
ماوەرۊ، کەلام، دەهەندەی داوەر
دایېم چەنی من، وە ڕېزە ڕازان
چوون یاری گېیانی، ئاواتە وازان
وەحی، هەر نەوع نەوع، جە لای شای غەففار
بە فرقە فرقە، ماوەرۊ بە وار
دایېم جە سامش، تەنگ مەبۊ نەفەس
گاه، سەڎاش بەرزەن، چوون ناڵەی جەڕەس
هەرچی جوبرەئیل، ماوەرۊ بە وار
مەشۊ، نە حیفزم، یەکیەک چوون تومار
نمەشۊ، حەرفش، هەرگیز، جە ویرم
دایېم، هەر وەحین، نەقشی زەمیرم.[1]