باخچێوە بېگەرد
نویستەی: میرزا ئۆلقاڎرو پاوەی
بەشۍ: پاڼزەهەمە
دماجار میکائیل ئامارە سەرو زەمینی، زەمینش تەرسنا، واتش: شای بۍ هامتا گەر فەرمان کەرۊن ئانە کەرۊت بە ئاو، مەتاونۊتۆ، قەناعەتش بە زەمینی کەرد هەکە خوڵەش دۊ پەنە، ئاڎییچ خوڵەکېش یاونا لاو زاتو حەقی:
میکائیل لوا، وە یەک نیم نەفەس
تا شیی وە حوزوور، بارەگای ئەقدەس
عەرزە سەر زەمین واتەن مەرفی ڕەقق
عەرز کەرد بە جەناب، مەوجوودی موتڵەق
ئیسرافیل وە حوکم، ڕەبولعالەمین
ئەو هەر ڕوو نېیا، وە ڕووی سەر زەمین
وات: حوببولفەرمان، ئەمری کارسازەن
وە قەدەر ئیمکان، خاکم نیازەن
زەمین جواب دا، وات: خاکم نېیەن
جە مەخلووقی بەڎ، عەزابم دییەن
باز هەم ئیسرافیل، چەنی جوبرائیل
پەیشان خاک نەبیی، تاکو شین لای جەلیل
ئەوان هەم ئەحواڵ، واتەی سەرزەمین
عەرز کەردەن، جە لای ڕەبولعالەمین
فەرما: عیزرائیل، فەردی تەنیای تاک
وە تەعجیل کیاست، وە زەمین، پەی خاک
قابز وات: زەمین، مەنزوورت چېشەن
زەمین و زەمان، حەقق سونعی وېشەن
ئەر مەیلش بۊ، گەردوونای گەردوون
مەکەرۊت، وە ئاو، بەبۍ چەند و چوون
زەمین وات: قابز حیکایەت دوورەن
ئامەنتو بیللا، خوڎام غەیوورەن
جە ڕووی دنیاوە، بەعزێ خاک ئاوەرد
سەبز و سفید و سییا و سرخ و زەرد
بەردش وە حوزوور، بینایی چاوان
شای کەسیر ئەلتەف، کەرەم فراوان.[1]