باخچێوە بېگەرد
نویستەی: میرزا ئۆلقاڎرو پاوەی
بەشۍ: نۊهەمە
میرزا ئۆلقاڎر باس جە خەڵق و دنیێ مەکەرۊن:
بە داخۆ میرزا ئۆلقاڎریج کەوتەن چېروو کاریگەری ئەفسانە کۊن و چنیاکا، هەکە باس جە خەلقو دنیێ مەکەران. ئەفسانەو (ئاوۍ و ماساوۍ و گاوۍ)، کە تڕکەڵەکێن بۍ هیچ بنەمێوە مدران و هیچ بنەمێوە شەرعی و زانستیش نیەن. ماچۊ: دلۍ بەحرو بۍ پەینە، مدرێنێ بۍ لەنگەر، مەبۊ نەلەخشۊ تا وەڕووی مەحشەر.
ئوستادی سانیع، کوللی مەسنووعات
ئیجاد کونەندە، جوملەی مەوجوودات
بۍ مەزد و میڼەت، بۍ فەعلە و ئەسباب
بۍ ستوون، بۍقال، بۍخورد و بۍخواب
بۍ خاب و بۍ ئاب، بۍ سەنگ و بۍ خشت
بینای موقتەدیر، مەوجوودسازی گشت
جە سوبحی سادق، یەکشەنبەی ئەوەڵ
قودرەت بەر وەکار، دنیای پەڕ خەلەل
جە هەڼەم جە بان، دنیا دا قەرار
زوڵماتی جەبان، دوزەخ کەرد ئیزهار
بادی عەجاییب، جە بانی زوڵمات
ونارا، تا ڕووی هەیهات و هەیهات
دیسان، هەم بەحرێ، جەو دەم کەرد ئیجاد
موعەووەق مدران، جە بانی ئەو باد
چل هەزار ساڵ، ڕای قەعرش دوورەن
بە قەولی ڕاوی، وەیتەور، مەشهوورەن
ماهی بوزورگی، عەزیمی ئەزرەق
سروشت کەرد واحید، سونعەت سازی حەقق
چەو بەحری بۍ پەی، مدران بۍ لەنگەر
مەبۊ نەلەخشۊ، تا وە ڕووی مەحشەر
جە پشتی ماهی، سازا یەک بەقەر
هەشتا هەزار عەین، چل هەزار سەر
مابەینی ئی سەر، تاکە وە ئەوسەر
پەنج سەڎ ساڵ ڕاهەن، بەڵکە زیاتەر
هەر سەرێ میقدار سێ سەڎ شاخ دارۊ
هەر شاخێ تەسبیح، زیکرێ مەویارۊ
ئوستادی ڼەققاش، لاجیوەرد کاریی
جە کەففی جەوهەر، دانەی مرواری
سازان، وەیتەورە، لوتفی ئیلاهیی
نیاش نە موهرە، پەشت گاوی ماهیی
مەعلوومەن ڕاوی، ڕوایەت ڕاسەن
چونکە فەرموودەی، ئیبن عەبباسەن
بەڵام، چوون بەقەر، سەبک بی بارش
نمەبی دایېم، دنیا قەرارش
ئارامش نەبۍ، جە وەقت و بۍ وەقت
دایېم مەلەرزان،چوون زەلزەلەی سەخت.[1]