دواڕۆژ، عیسا عەبدولقەهار
وتەبێژی وەزارەتی گواستنەوە و گەیاندنی هەرێم ڕایدەگەیەنێت: بەهۆی پابەندنەبوون بە مەرج و ڕێنماییەکانەوە، گرێبەستی 20 کۆمپانیای ئینتەرنێت هەڵدەوەشێننەوە و گرێبەستەکانیان بۆ نوێناکرێتەوە.
ئومێد محەمەد، وتەبێژی وەزارەتی گواستنەوە و گەیاندنی هەرێم ئەمڕۆ یەکشەممە 13ی کانوونی یەکەم بە دواڕۆژی ڕاگەیاند: 20 کۆمپانیای ئینتەرنێت کە گرێبەستیان لەگەڵ حکومەتی هەرێم کردووە بۆ گەیاندنی خزمەتگوزاری ئینتەرنێت، بەشێکیان پابەندی مەرج و ڕێنماییەکانی وەزارەتی گواستنەوە و گەیاندن نەبوون و بەشێکی دیکەشیان باجی ساڵانەیان نەداوە، بۆیە ناچار گرێبستەکانیان هەڵدەوەشێنینەوە و مۆڵەتەکانیان بۆ نوێناکرێتەوە.
لەبارەی پێدانی مۆڵەت به و کۆمپانیایانەی لەبواری گەیاندنی ئینتەرنێت کاردەکەن، وتەبێژی وەزارەتی گواستنەوە، وتی: ژمارەیەکی زۆر کۆمپانیا لەهەرێم هەن، بۆیە ئەمە وایکردووە کە فریکوێنسی نەمێنێت، لەبەرئەوە پێدانی مۆڵەت بە کۆمپانیای نوێی بواری ئینتەرێت ڕاگیراوە تاوەکو ئەوکاتەی ئه و کێشەیە چارەسەردەکرێت.
لەهەرێمی کوردستان 60 کۆمپانیا لەبواری گەیاندنی خزمەتگوزاری ئینتەرنێت کاردەکەن، بەڵام وەزارەت لەگەیاندنی ئه و خزمەتگوزارییە ڕازی نییە و هۆشداری پێداون لە خاوبوونەوەی هێڵەکانی ئینتەرنێت.
پێداچوونەوە: ئارام غەفور[1]
#13-01-2019#