24 دەژمێرێن دەربازبووی، 3 کەس د ئاڤێن #دهۆک# دا خەندقین کو ئێک ژوان کوردێ رۆژئاڤایێ کوردستانێ بوو و ئێک زاڕۆک بوو یێ دی ژی زەلامەک بوو و تانوکە جەنازەیێ وی د رووبارێ زێیێ مەزن دا نەهاتیە دیتن.
رائید بێوار عەبدولعەزیز، بەرپرسێ راگەهاندنا بەرڤانیا باژاری ل دهۆک بۆ دواڕۆژ گۆت دووهی کچەکا 12 سالی د ئاڤا گەلیێ شێرانە دا سەر ب قەزا ئامێدیێ و گەنجەکێ 17 سالی د رووبارێ خابووری دا ل نێزیک پرا دەلال ل قەزا زاخۆ خەندقین.
هەر دووهی ل گوندێ هەمدلان ل دەڤەرا بارزان، زەلامەکێ ژیێ وی نزیکی 45 سالان ل دەمێ گرتنا ماسییان گەڤتیە د ئاڤێ دا و تانوکە جەنازەیێ وی نەهاتیە دیتن.
دلسۆز هەمدلان، بۆ دواڕۆژ گۆت دوهی وەلاتیێن دەڤەرێ و تیمێن نقۆمڤانێن سوران وشێلادزێ گەلەک هەولدان جەنازەیێ وی زەلامی ژ ئاڤێ دەربێخن لێ ئه و هەولدان بێ ئەنجام بوون، ئەڤرۆژی لێگەریان بەردەوامە و دێ تیمێن نقومڤانێن دهۆک ژی لێگەریانێ کەن.
ل گۆرەی ئامارێن رێڤەبەریا بەرەڤانیا باژاری ل پارێزگەها دهۆک د ئەڤ سالە دا ل سنۆرێ پارێزگەها دهۆک 26 کەس د ئاڤان دا خەندقینە و 17 کەس ژی ژ ئالیێ تیمێن نقومڤانان هاتینە قورتالکرن.[1]
26-08-2017