مەراسموو هەزاردەفی جە هۆرامان
مەراسموو دەف نەوازی بە گردی و ئیسە کە بېیەن بە هەزار دەفی یۊ جە مەراسمە دێرینەکاو خەڵکوو هۆرامانین. ئی مەراسمە چی چن ساڵە دماینەنە ئەوەفاڕیایش ئامان سەرەرە و جە هۆرامان بە شێوازێوی تایبەت و تازە ملۆ ڕاوە. بەشداری خەڵکوو هۆرامانی و گەردەشگەرێ مەحاڵەکاتەری ئێرانی چی مەراسمەنە یەکجار وەرچەم و یاگێ سەرنجینە. دماو بەڕۍسمی ئەشناسای هۆرامانی و تاریخ و داب و نەرێتەکەیش جە لاو یونسکۆیوە پېسەو میرات فەهەنگی جەهانی، ئی مەراسمە گرد ساڵێو چرووپەڕتەر و وەرفراوانتەر جە دەگایەکاو هۆرامانی، بە تایبەت چا دەگایانە کە بە شێوازێوی پلێکانی کریاینێوە، ملۆ ڕاوە. هۊرچنیەی ئی دەگا پلێکانیا بېیەن هۆکاروو زەریفی و وەچەم کەوتەی گردو مەراسمەکەی کە بەبۍ گومانە پەی گەردەشگەرا فرە سەرنجگرفتن. یۊ جە تایبەتمەندیە تازەکاو ئی مەراسمێە بەشداری گردلایەنەو ژەنان بە جلوو بەرگێوی زەریف و ڕازیاوە و هۆرپڕای چی مەراسمەنە. تەنانت کریۆ واچمێ ژەنی پېشەنگێنی جە ڕېکوستەی و ڕاوەبەردەی هونەرمەنداو مەراسمەکەی. جیا چانەیە دەسڕەنگینی ژەنا بە پېشکەشکەردەی واردەمەنی و بەرهەمە دەسیەکاو خەڵکوو هۆرامانی یەکجار وەرچەم و پرڕەنگەن. هۆرامان کە ئەشناسیان بە بیناسازی پلێکانی، ئاووهەوای وەش، داب و نەریتی تایبەت و دێرینە، جلووبەرگی تایبەت پېسەو کلاشی و چۆخەڕانکی و.... و هەر پاسە واردەمەنی تایبەت و فرە سرووشتی، بېیەن هۆکاروو گەشەو گەردشگەری جە هۆرامان.
بەڵگە دێرینەشناسیەکا سەلەمنانشا کە زیاتەر جە 40 هەزارساڵی چیوەڵتەری هۆرامان یاگی ژیوای بېیېنە و کۊمەڵگا و یاسا وڕێسا باوش بېیەن.
-- ویدئو، مەراسموو هەزار دەفی جە دەگاو دەگاگای جە بەشوو پلێکانی دەگاینە کە قەڎێمیتەرەن.
موختار کەریمی.[1]