=KTML_Bold=تاوەکوو ئێستا بەغدا زۆرینەى داواکارییەکانى تایبەت بە پشکى هەرێمى ڕەتدەکاتەوە
تا یەکلاینەکردنەوەى ئەو کێشانە چارەنووسى مووچەى فەرمانبەران بە نادیارى دەمێنێتەوە=KTML_End=
دواى نەگەیشتن بەرێککەوتن لەگەڵ شاندى حکوومەتى بەغدا، شاندەکەى هەرێمى کوردستان لە ڕێگەى داواکارییەکى فەڕمى چەند داوایەک لە بارەى پشکى هەرێم لە بودجەى ئێراق پێشکەشى سەرۆکوەزیرانى ئێراق دەکەن و داوا دەکەن بڕیارى لەسەر بدات.
دواى چەندین کۆبوونەوە لەگەڵ شاندى حکوومەتى ئێراق و کۆبوونەوەى چەند کاتژمێرى ڕابردووى هەردووک شاندى حکومەتى هەرێمى کوردستان و ئێراق. شاندى حکوومەتى ئێراق بە پشت بەستن بە یاساى بودجەى ئێراق داوا دەکات سەرۆک وەزیرانى ئێراق ئەو پرسە یەکلایبکاتەوە و بۆ ئەمەش چەند داواکارییەکیان پێشکەشى محەمەد شیاع سوودانى کردووە.
لەو نووسراوەدا شاندى حکوومەتى هەرێمى کوردستان داوا لەسەرۆک وەزیرانى ئێراق دەکەن تەواوى شایستە دارایییەکانى هەرێمى کوردستان لە مووچە و بودجەى بەکاربردن و وەبەرهێنان وەک ئەوەى لە یاسایى بوجەدا هاتووە بدرێت بە هەرێمى کوردستان لەگەڵ پێدانى خەرجى و حەقدەستى بەرهەمهێنان نەوت و گواستنەوەکەى.
لە بەرانبەر پێدانى شایستە داراییەکانى هەرێمى کوردستان و خەرجى بەرهەمهێنان و گواستنەوەى نەوت لە نووسراوەکەدا حکوومەتى هەرێم ئامادەیى خۆی نیشانداوە بەپێى دەستوور و یاسایى ئیدارەى دارایى سەدا پەنجاى داهاتى ناوخۆیى و گومرگ ڕادەستى بەغدا بکات.
شاندى حکوومەتى ئێراق و وەزارەتى دارایى لە ڕابردووە و لە ئێستاشدا بەشێک لەو داواکاریانەى حکوومەتى هەرێمیان ڕەتکردۆتەوە و هەر بۆیە حکوومەتى هەرێمى کوردستان بە ناچارى ئەو داواکاریەیان خستۆتە بەردەم سەرۆکوەزیرانى ئێراق.
تاوەکوو ئەو ناکۆکیانەى لەنێوان هەرێمى کوردستان و بەغدا یەکلانەکرێتەوە و چارەنووسى مووچەى مانگى تەمموزى فەرمانبەران بە نادیارى دەمێنێتەوە. [1]