چناری هەوڵی
بەشۊ یەکەمی
میرزا ئۆلقاڎر، مەجنوون ئاسا بە یاڎو ژیوای جارا، عیشوەو نازارا، شییەن پەی سەرچەشمەو (هەوڵی) جە شارو پاوەی، کە زانیان هەوڵی سەرچەمە و ئاوێن جە پاوەشارەنە، دڵگیری و فېنکی و وەشیش مەر میرزا شەفیعی پاوەی و میرزا ئۆلقاڎری پاوەی تاوابۊشا تاریفۍ جوانیش کەران.
چاگە میرزا چن لامشتێ جە ئاوەو سەرچەمەو هەوڵی نۊشکەرۊن، قەیس ئاسا دەردانش دېویان، خەیاڵانش پەرواز کەران پەی تافو جارانی، وەختێ چەنی نازارا سەرو ئا چەشمەیۆ خەریکو عەیش و نۊشی بییەن.
میرزام ڕاگوزەر میرزام ڕاگوزەر
ئارۊ قەیس‌ئاسا نەڕای ڕاگوزەر
وەعەزم سەیران سارا و دەشت و دەر
تا شییم وە (هەوڵی) سەرچەشمەی کەوسەر
دیم ڕەنگی عەجیب تەرحی نازەنین
شیرین‌تەر جە کار ئوستادان چین
چوون حەیات و حەوز شازاڎەی ئەرژەنگ
حەسارێ جە سیم کېشیان جە سەنگ
مەدرەخشا چوون جام جەهاڼمای جەم
نە جۊی (سەل‌سەبیل) هیچش نیەن کەم
حاشیەی حەوزش ئەوەند بېگەردەن
هەر ماچی شاپوور جەدوەلیش کەردەن
مەوج مەڎۊ ئەو ئاو زەراڵ بېگەرد
مەیۊ مەویەرۊ وېنەی مائولوەرد
فەزا مەبەخشۊ وە ئەروا کۊ کۊ
سەردتەرەن جە یەخ بەفر شاهۊ کۊ
مەعلووم بۊ لېتان یاران دڵداران
سەرچەشمەی کەوسەر هەوڵیەن یاران
ئافەرین شەفیع شوعرای خاس‌خەیاڵ
فەردت باقیەن تا وە هەزار ساڵ
سەراو چوون (هەوڵی) مەسکەن چوون (پاوە)
ماچی بەهەشتەن وە ڕووی دنیاوە
منیچ تەسدیقم تەمام کەردەن پېش
یەقین کەوسەرەن بۊی حۊر مەیۊ لېش
هەرکەسێ بیمار جەستەی دەرد مەبۊ
ڕوخسارش جە عەشق هیجران زەرد مەبۊ
یەک قەترە جەو ئاو وەشاڎ بنۊشۊ
چوون دەریای عومان زەوقش مەجۊشۊ
نمەوۊش هەرگیز هیچ ئاهوو ناڵە
مەشۊ نە توغیان دووهەفتە ساڵە
منیچ قەیس‌ئاسا بەعزێ لېش وەردم
وېنەی ساداران دېویا دەردم
هەوام شیی نە تاف جلووس جاران
ئەو عەیش وەرین چەنی نازاران
پشت دام بەو چنار جەوهەر بەندەوە
بەو ڕەعنای بېعەیب ئاڵای ڕەندەوە
ئەو نۊبەر نەمام قەدیم ئیجادە
شووخ تەرەڵان خوڎا پېدادە
دیم فەرقش نە فەوق میزان ۋیەردەن
کاکۊڵش نەپای فەڵەک پەخش کەردەن
ئیرادەی پەیوەند شاخ (گوبی) شەن
یا تەمای تەواف مزگی ئەقصاشەن
لاڎێ حەیران بیم جە بەرزی باڵاش
بەو شۊخ ئەندام سفیدی کاڵاش
سافتەر جە سینەی شیرین دڵبەر
شۊختەر جە قامەت شاخ نەی شەکەر
مەلەرزا وە باد شنۊی سوب سەحەر
مەشنیا چوون سەرو سەرچەشمەی کەوسەر.[1]