دەقی پەیامەکەی #نێچیرڤان بارزانی#:
ساڵى تازەی زايينی لە خانەوادەی سەربەرزی شەهيدان، پێشمەرگە قارەمانەکان و هێزە ئەمنییەکان، لە تەواوى گەلى کوردستان و ئێراق و جيهان پيرۆز دەکەم. ئومێدەوارم ساڵى بەديهاتنى هيواکان و سەرکەوتن، بڕانەوەى شەڕ و ئاڵۆزى و پەتا و ناوخۆشييەکان بێت، ئارامى و ئاسايش و سەقامگيرى، باڵ بەسەر تەواوى مرۆڤايەتيدا بکێشێت.
دەبێ بەرژەوەندیی گەلی کوردستان، ئامانجی سەرەکیی هەموومان بێت، با لەگەڵ دەستپێکردنى ساڵى تازەدا، يەکڕيزى، تەبايى، پێکەوەيى، يەکترقبووڵکردن و هاريکاريى هاوبەش، بکەينە لاپەڕەيەکى نوێى پەيوەنديى نێوان هێز و لايەنە سياسييەکان و هەموو پێکهاتەکانى هەرێمى کوردستان. پێکەوە کار بکەين بۆ پاراستن و مسۆگەرکردنى مافە دەستوورييەکان و فيدراڵى و چارەسەرکردنى کێشەکان لەگەڵ حکوومەتى فيدراڵى ئێراق لەسەر بنەماى دەستوور.
دووپاتى دەکەينەوە کە هەرێمى کوردستان ئەرک و بەرپرسياريەتيى هاوبەشى خۆى جێبەجێ دەکات، وەک هەميشە فاکتەرى ئارامى و سەقامگيرى دەبێت، بۆ هەموو هاوکارييەکيش ئامادەيە لەپێناو ڕووبەڕووبوونەوەى تەحەدييەکان و چارەسەرکردنى کێشەکانى وڵاتدا، بۆ بەديهێنانى ئارامى و سەقامگيريى سياسى و ئەمنى لە ئێراق، بە شێوەيەک ماف و شايستەکانى هەموو پێکهاتەکانى وڵات پارێزراوبن.
لەگەڵ وڵاتانى دراوسێ و ناوچەکە و دۆستان و هاوپەيمانيى نێودەوڵەتى، بره و بە پەيوەندييەکانمان لەسەر بنەماى ڕێزلەيەکگرتن و بەرژەوەندیی هاوبەش دەدەين. لە هاريکاريى هاوبەش بەردەوام دەبين بۆ ڕووبەڕووبوونەوەى مەترسييەکانى تيرۆر و نەهێشتنى تيرۆریستان. پێکەوە کار دەکەين بۆ چەسپاندنى ئاشتى و ئارامى و سەقامگيرى.
کار دەکەين بۆ باشترکردنی ژیان و گوزەرانی هاووڵاتیان، بۆ قووڵکردنەوەى زياترى فرەيى، پێکەوەژيان، لێبوردەيى، پاراستنى ديموکراسى، مافەکانی مرۆڤ، یەکسانی و ئازادييەکان. بە ئومێد و گەشبينييەوە لە ساڵى نوێ و داهاتوو دەڕوانين. هيواى تەندرووستييەکى باش، سەرکەوتن، شادى و کامەرانى بۆ هەمووان دەخوازم.
نێچيرڤان بارزانى
سەرۆکى هەرێمى کوردستان
2022/12/31[1]
تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!