#وەلی دېوانە#
جەی شۊلەی (شەم) ە، جەی شۊلەی (شەم) ە
ئەی بارەکەڵڵا جەی شۊڵەی (شەم) ە
جەی نۇری مونیر چەرخی چوارەمە
جەی شەوقی جەماڵ ماهی دۇ هەفتەمە
جەی تاقی مېحراب ئەبرۊ کەمانە
جەی مەودای موژگان مەستی قەترانە
جەی سیمی (ئەنف) ئەلف نیگارە
جەی گۊنای گوڵبېز گوڵ و گوڵزارە
جەی زوڵف کەمەند دڵان پېگیرە
جەی حەڵقەی تەناف گېسۇ و زەنجیرە
جەی لەعلی لەبان پڕ جە گەوهەرە
جە ڕازی ڕازان ڕېزەی شەکەرە
جەی چای زەنەخدان شېوە شیرینە
جەی (زنج) ی زیبای تۊپی زێڕینە
جەی مینای بلۇر مەملوئ جە بادە
جەی ساقی گەردەن سوراحی سادە
جەی نیم نیگای ناز ئەو نازفرۊشە
جەی گۊشەواران ئاوېزای گۊشە
جەی جفتی قەندیل چەمان جە نۇرە
جەی سەدری سینەی سفید بلۇرە
جەی سامی سەنگین ئی سام سەنگینە
جەی (ساعد) ی سیم پەنجە ڕەنگینە
جەی ڕامی خاوە ڕەفتی غەزاڵە
جەی (کەتف) و (کەمەر) ئاهۇی بەرماڵە
جەی (چەم) ی غەزەب شیرین نېگارە
جەی (ناف) ی مشکین ئاهۇی تەتارە
ڕۇی تەرحی تەسویر سەنعان کەرد جە دین
وەڵڵا مەر شېوەی گوڵ-ئەندامی چین
چەن ئەییام سەردار سەوڵانی تەڕ بۊ
ئەسپەردەی ئیمام زامن خەبەر بۊ
[1]