وەلی دېوانە
ڕیسوای زەمانەم، ڕیسوای زەمانەم
(قەیس)ی قەدیمی ڕیسوای زەمانەم
(پەروانە)ی پەشېو سەحرای وېرانەم
عەبداڵی بەڕگېڵ بېزار جە یانەم
(جوغد)ی خانە چۊڵ شەوان بېخاوم
تەن تەنیای مەلۇل دیدە لېڵاوم
هەراسان نە دېیەی دیدەی یارانم
دیدەوانی دەیر سەر دېیارانم
بېزار جە زامەن بېزیای دۊسم
شەو تا ڕۊ نەفېکر کەد و کەڵپۊسم
عەسای خەم وەدەس (خەمر)ی خەمنۊشم
لېوەی لەنگ و لاڵ لۊنگی خەمپۊشم
سزای ستەمکېش سېیای ستارەم
(فەرهاد)ی کۊکەن مەنزڵ مەغارەم
ڕای شەش دەر وە بەخت سېیا دەربەستم
پەشیمان جە گشت پەشېو حاڵ جەستەم
جفت چەمیدەی چەرخی چەپ گەردم
دەردەداری سەخت دۇر جە هامدەردم
(تەن) سېیا چڵۊسک سەردېیارانم
سفتەی شەماڵ گڕ کۊی ئایرانم
دڵ ئازوردەی زوڵم زەمانەی زشتم
چەرخی کەمان پشت شکەستەن پشتم
شەو دیدە بېخاو ڕۊ بېقەرارم
گرفتاری جەوری ڕۊی ڕۊزگارم
بېزیا جە ژینم ڕازی وە مەرگم
سەد جار نېش خاری هېجران بە جەرگم
چەمەڕای خېڵان ڕیسوای هۊزانم
بە عەشقی شەخسێ [دەرۇن] سۊزانم
گرۊی وەحشییان بېیابان گېڵم
(قەیس)ی تانەکېش بینایی لېڵم
دڵ پەروانەی عەشق شەم ڕوخسارێکم
پېکېیای پەیکان دیدەی یارێکم
(حاتەم) خەیاڵێ قاتەن نە بارەم
بزانۊ وەحاڵ دەردی بېچارەم
چۇن نەوفەل بەیۊ نە ماوای هەردان
باوەرۊمەوە وە لای هامدەردان
بەڵۍ جە وەسواس شەیتانی دۇر بۊ
چۇن حاتەم خاتر خوداش مەنزۇر بۊ
گوشاد کەرۊ دڵ خەمناک و خەستەم
شاد کەرۊم بە وەسڵ ئەو ئاوات وەستەم
مەر مەولای غەمخوار بسازۊ کارم
وەر نە بەردابەرد ڕۊی ڕۊزگارم
[1]