ناونیشانی بابەت: #کفری# لە 31ی ئابی 1854 کراوەتە ناوەندی سەنجەقی زەنگاباد
نووسەر: سەباح عەلی جاف
بەپێی بەڵگەیەکی #عوسمانی#، لەکۆتایی ئابی 1854 (7ی زولحجەی 1270) دەرچووە، لەبەر بایەخی پێگەی ناوچەکە و پێکەوەبەستنیان وەک ناوەندێکی گرنگ، کفری کراوەتە ناوەندی سەنجەقی زەنگاباد لە ئەیالەتی #شارەزوور#، هەریەک لە(کفری، زەنگاباد، قەرەتەپە، دووزخورماتوو)ی لەخۆ گرتووە.
هەر بەپێی ئەو فەرمانەی عوسمانی، هەریەک لە ئەندامی ئەنجوومەنی کەرکووک (نەفتچی زادە عومەر بەگ) بە مووچە 3000 قڕۆش بە قایمقام و قەڵەمی کاتیبی ئەیالەت محەمەد ئەفەندی بە مووچەی 450 قڕۆش و مەحموود ئەفەندی بە مووچەی 350 قڕۆش بە کاتبی دارایی دامەزراون.
هەر لە فەرمانەکەدا هاتووە، کە بەگوێرەی پێویست و بە شێوەیەکی گونجاو، بە بڕە مووچەیەکی گونجاویش کاتبێکی فارسی و کاتبێکی عەرەبی دابمەزرێن، هەروەﮪا بۆ کاروباری ئەمنیەت و کۆکردنەوەی داﮪات بە مووچەی 100 قڕۆش چاوشێک و 18 نەفەری زەبتییەی پیادە بە مووچە 50 قڕۆش دامەزراون، هەر لە فەرمانەکەدا هاتووە، قەزای کفری بکرێتە ناوەندی لیوا و بۆ ئەمەیش ئەنجوومەنێک دابمەزرێت.
وەک دەردەکەوێت، بەگوێرەی فەرمانەکە زەنگاباد کراوەتە ناوی ئەم سەنجەقە تازەیە، ناوەندەکەیشی قەزای کفری بووە.
ئەم فەرمانە لە لایەن وەزارەتی (نەزارەت)ی دارایی و ئایەلەتی شارەزوورەوە هاتووە و نووسراو کراوە لەلایەن سەدری ئەعزەم لە ئەنجوومەنی باڵا و فەرمانەکەیش لەلایەن سوڵتانەوە جێبەجێ کراوە.
هەر بەپێی بەڵگەنامەکانی عوسمانی، لە پاشتردا (سەڵاحیه)یش بۆ ناوی قەزای کفری بەکار هاتووە، هەر لە بەڵگەنامەکاندا ناوی چەندین شوێن و ناوچەی دیکەی ئاوەدان بەرچاو کەوتوون، لەوانە: سەرقلعە (سەرقەڵا)، شاکەل، #شێروانە# (کەلار)، میحنتئاباد (میحنەتاوا)، سورخلیل (سەید خەلیل).
[1]