باخچێوە بېگەرد
نویستەی: میزا ئۆلقاڎرو پاوەی
بەشۍ: شەسس و چوارەمە

عەبدولموتەلیب، بە عەبدوڵڵای کوڕیش واتش: ئانە خەریکەن (ئامینۍ) ژەنیت، زاڕۊڵەش مەبۊن، بە پەلە لوە پەی مەدینەی خورماوی بارە، ئاڎییچ بە فەرمانو تاتەیش خېزیاو لوا ڕوەو شارو مەدینەی، بەڵام ڕانە تووشو نەوەشیێ بی و گیانش ئەسپارا، چا وەختەنە تەمەنش سی ساڵۍ بۍ.
عەبوڵڵا، وە ئەمر، فەرموودەی پدەر
ڕاگەی مەدینە، دەرلا، گرت، نە وەر
ناقەی جامبازە، پەرواز دا، وە باڵ
تەی مەکەرد، ڕاهان، وېنەی، بای شەماڵ
تا، چن ڕوز، وە شار، مەدینە، یاوا
خاستەر، جە ڕەوزەی، جەنەتلماوا
جە ناگاه، دەردێ، نازڵ، بیی پەرێش
بېزار، بی، جە شەوق، زیندەگانی وېش
تا، ئاخر، شەربەتی سەکراتش، چەشت
ڕۊحش، پەرواز کەرد، پەی ڕەوزەی بەهەشت
غەرەز، ئەو ناکام، نەوتوول ساوا
عومری شەریفش، وە سیی ساڵ، یاوا
بەرشی جە دنیا، مەلاڵی، ماتەم
دیڎاری فەرزەند، وېش، نەڎیی، وە چەم
چەنی حەسرەتان، داخی دەردەوە
سەر نیا، وە خاک، سیای سەردەوە
چەو دما، شەخسێ، وە ئاهو ناڵە
دا، وە موتەلب، ئی بەڎ هەواڵە
عەبدولموتەلیب، ئینا لیللا، وەند
مەتلیا، وە زام مەرگی ئەو فەرزەند
ئامینەی بېعەیب، نەو عرووسی نۊ
کۊ بیی، وە باڵاش، کۊی خەرمان، کۊکۊ
تاکە، دوو سێ ماﮪ، تەعزیەدارە بۍ
ڕۊ، جە ڕۊ، فېشتەر، بېقەرارە، بۍ.[1]