ئەنوەر حسێن بازگر
ئەم کتێبە لە چەند بەشێک پێکهاتوە، هەریەک لەو بەشانە باسێکن دەربارەی دەوڵەتی عێراق و ڕابردووی ئەم دەوڵەتە و ئاسۆی داهاتووی ئەم وڵاتە لەبەر ڕۆشنایی پێدراوە سیاسییەکانی ئێستادا. نووسەر بابەتە هەنووکەییەکانی ئەم چەند ساڵەی پاش ڕووخانی ڕژێمی بەعسی هێناوە و شیکردنەوەی بۆ هەر یەکێکیان کردوە، لەوێوە دەستنیشانی ئاڕاستەی سیاسیی ئەم دەوڵەتە دەکات. وەک لە ناونیشانی کتێبەکەوە دیارە ئەو هەمەجۆریی و فرەییەی لە عێراقدا هەیە، بۆتە پاڵنەری نووسینی کتێبێکی لەم شێوەیە. کتێبەکە چەند ناونیشانێک لەخۆدەگرێت، لەوانە: (خوێندنەوەیەک بۆ پلورالیزەبوونی عێراق، خوێندنەوەیەک بۆ پێکهاتەکانی عێراق دوای سەدام حسێن، لە ڕێگرییەکانی پلوڕالیزەبوونەوە بۆ سیستەمێکی سیاسیی مۆدێرن، ئەو سێ میحوەرەی واشنتۆن پێویستی پێیەتی بۆ ڕووخاندنی حکومەتی عێراق). لەگەڵ چەندین بابەتی دیکە، کە هەموویان بە ئامار و داتا و زانیاریی ورد دەوڵەمەندن.