ساڵی 1957 لە #پێنجوێن# لە دایکبووە، قۆناغی سەرەتایی و ناوەندی لە پێنجوێن تەواوکردووە، دواناوەندی و ئامادەیی لە سلێمانی تەواوکردووە، ساڵی 1978 لە کۆلێژی فقهەی نەجەف وەردەگیرێ، خوێندن تەواو دەکات، کە دەبێتە پاشخانێکی باش بۆ فێربوونی زمانی عەرەبی. لە ڕۆژنامەکانی: هاوکاری و دەنگی کرێکار گۆڤاری ڕۆشنبیری و بەیان، ناو بەناو هۆنراوەەکانی بڵاوکردووەتەوە.
لە دوای خوێندن، دەبێتە سەرباز لە باشووری ئێراق، بەهۆی توندبوونی بەرەی جەنگی ئێراق -ئێرانەوە، نەیویستووە ببێتە سوتەمەنی ئەو جەنگە وێرانکارییە، خۆی دەربازدەکات و ڕوو دەکاتە ناوچە ئازادکراوەکانی ژێر دەسەڵاتی شۆڕش، وەک مامۆستایەکی خۆبەخش وانە بە منداڵانی گوندەکان دەڵێتەوە. پاشان بیر لە گرتنەبەری ڕێگای دەرەوەی وڵات دەکاتەوە و ڕوودەکاتە ئێران، لە ناوەڕاستی ساڵانی هەشتاکاندا، لەگەڵ ژمارەیەک لە هاوڕێ و نووسەر و شاعیر، لە تاران، وەک پەنابەریەک لە چاوەڕوانی ئەوەدا دەبێت بنێرێتە وڵاتی دووەم. بەڵام بەخت یاوەری نابێت لە تاران دەمێنێتەوە، تا کاتی وەستانی جەنگ و لێبوردنی گشتی، دەگەڕێتەوە سلێمانی.
لەو ڕۆژگارەی ئێراندا توانی خۆی فێری فارسی بکات و کەڵک لەو زمانە وەربگرێت.
لە ساڵی 1987 دیوانی «زەمانی بزربوو» بڵاوکردووەتەوە، ئەندامی یەکێتی نووسەرانی کوردە، بەشداری چەندین کۆڕی هۆنراوەی و ڤیستیڤاڵی ئەدەبی کردووە.
[1]