بەرپرسی لقی 3ی #پارتی دیموکراتی کوردستان# ڕایگەیاند، لەسەر ئاستی باڵا گفتوگۆ لەبارەی پێکھێنانی حکوومەتی خۆجێی #کەرکووک# ئەنجام دەدرێت و دەشڵێت: ئێمە ھاوکار دەبین، بەڵام ھەر کاتێک ئەنجامی کۆتایی هەڵبژاردن بە فەرمی ڕاگەیەنرا، دەست بە دانووستان دەکرێت و لە ماوەی مانگێکدا حکوومەتی خۆجێیی پێک دەھێندرێت.
بەرپرسی لقی 3ی پارتی دیموکراتی کوردستان لە کەرکووک، محەمەد کەمال، بۆ ماڵپەڕی فەرمیی پارتی دیموکراتی کوردستان وتی: دوای کردنەوەی بارەگای لقی سێی پارتی دیموکراتی کوردستان لە کەرکووک، حیزبەکان بۆ پیرۆزبایی سەردانمان دەکەن و ئەمڕۆ #09-01-2024# شاندێکی #یەکێتیی نیشتمانیی کوردستان# بۆ پیرۆزباییکردن سەردانی ئێمە دەکەن، بەڵام بۆ گفتوگۆکردن لەبارەی پێکھێنانی حکوومەتی خۆجێیی، لەسەر ئاستی باڵا گفتوگۆ دەست پێدەکات و ئێمەش ھاوکارییان دەکەین، بۆیە سەرەتا لەسەر ئاستی باڵا پێویستە لێکتێگەیشتن ھەبێت و گفتوگۆکان دەست پێبکەن.
محەمەد کەمال وتیشی: ئێمە پێمان گرنگە کە لە کەرکووک کورد یەک دەنگ و یەکگرتوو بێت، بەڵام ھێشتا بە فەرمی ئەنجامەکان ڕانەگەیەنراون و چاوەڕێی ڕاگەیاندنی ئەنجامی فەرمین و دواتر دەست بە گفتوگۆ دەکرێت بۆ پێکھێنانی حکوومەتی خۆجێی کەرکووک و لە ماوەی مانگێکدا پێویستە حکوومەت پێکبێت. [1]