منداڵان بە گشتی لە تەمەنی نێوان 6 مانگ بۆ 12 مانگی ددانیان دێت، کە دەبێتە هۆی ئەوەی پوکیان سوور بێتەوە، لیکیان زیاد دەبێت، زۆرکات پلەی گەرمی جەستەشیان بەرزدەبێتەوە و نائاسوودە دەبن.
بە پێی ڕێنماییەکانی پزیشک، دایکان و باوکان بۆ ئەوەی ئازاری ددانی منداڵەکانیان کەمبکەنەوە، دەتوانن خاولی تەڕ یان ئەو ئەلقانەیان پێبدەن کە تایبەتە بەوەی منداڵ گازی لێبگرێت، یاخود خواردنی ساردیان پێبدەن، چونکە ساردیی هەوکردن کەمدەکاتەوە و کاتێک منداڵەکە گازی لێدەگرێت پشووی پێدەدات و ئازاری کەمدەبێتەوە.

گرنگە پێشتر ڕێنمایی لە پزیشک وەربگریت، چونکە هەندێک کات منداڵ هەستیاریی بە شتێک هەیە، یان هەوکردنی پوکی منداڵەکە حاڵەتێکی نائاسایی بێت و پێویستی بە چارەسەری پزیشکی هەبێت.
هەروەها لەو ماوەیەی منداڵەکەت ددانی دێت، هەوڵبدە سیستمی بەرگری جەستەی بەرز بکەیتەوە، بۆ ئەوەی بە ئاسانی ئەو قۆناغە تێپەڕێنێت، ئەگەر منداڵەکەت لە کاتی ددان هاتن، پلەی گەرمی جەستەی بەرز بووەوە، تووشی سکچوون بوو و پوکی تووشی هەوکردن بوو، پێویستە نیشانی پزیشکی بدەیت. [1]