پارتی دیموکرات و یەکێتی نیشتمانی لیژنەیەکی هاوبەش بۆ دواخستنی هەڵبژاردنی پەڕڵەمانی کوردستان پێکدەهێنن، کە بڕیارە لە مانگی 11ی داهاتوو ئەنجامبدرێت.
لە ئەنجامی گفتوگۆکانی چەند ڕۆژی ڕابردووی نێوان پارتی و یەکێتی، هەردوولا گەیشتوون بەو بڕوایەی لەمساڵدا 2023 ناتوانرێت هەڵبژاردنی پەڕڵەمانی کوردستان ئەنجامبدرێت و دەبێت بکەوێتە ساڵی داهاتوو.
پارتی و یەکێتی لەسەر پێکهێنانی لیژنەیەک بۆ ئەو مەبەستە ڕێکەوتوون و بڕیارە لیژنە هاوبەشەکە بەم نزیکانە دەست بە کۆبوونەوە لەگەڵ لایەنەکانی تری هەرێم و تەنانەت نوێنەرایەتی وڵاتان لە #هەولێر# بکات کە جەخت لە ئەنجامدانی هەڵبژاردن دەکەنەوە لەکاتی خۆیدا.
ئەو لیژنەیە سەرەتا لەگەڵ سەرجەم لایەنەکانی هەرێم بە جووڵانەوەی نەوەی نوێشەوە کۆدەبنەوە و دەیانەوێت هاوڕایی هەموو لایەنەکان وەربگرن، کە بەم بارودۆخەوە ناتوانن هەڵبژاردن لەمساڵدا ئەنجامبدەن.
زانیارییەکان باس لەوەش دەکەن، دوای کۆبوونەوە لەگەڵ لایەنە ناوخۆییەکان لیژنەکەی پارتی و یەکێتی بە پشتیووانی لایەنەکان دەست بە کۆبوونەوە لەگەڵ نوێنەری وڵاتانی بیانی کۆدەبنەوە، بۆ ئەوەی ڕوونکردنەوەیان لەبارەی ئەوەوە پێبدەن ناتوانن لەمساڵدا 2023 هەڵبژاردن بکەن. [1]