فیدای سنعت بام
بەشۍ چوارەمە
میرزا ئۆلقاڎر، دمای مەدح و سەنایێ فرەیش پەی شېخ عەبدولقادری گەیلانی جە بەغڎاشار، چەنی گوزەرو تەریقەتی مەگنۊ ڕا، شېخ عەبدولقادری گەیلانی خەڵاتو نەقشی مسپارۊ بە(سەیید عەبدولرزاق)ی، ئاڎییچ دمای چن ساڵا جە سالاری تەریقەتی، مسپارۊش بە(عوسمان جەبەلی)، سینە بە سینە مەیاوۊ لاو(شېخ ئەحمەدی هیندی لاهووری)،

دیسان هەم ڕووکەین وەلای تەریقەت
سیلسیلەی پیران شارای حەقیقەت
بزانین جە کۊ مەگېرۊ مەنزڵ
مەقسوودش پەی کۍ مەکەرۊ حاسڵ
وەختێ کە جەناب غەوسی بەغڎاشار
تەریقەی تەوحید دنیاش دا قەرار
ڕوو کەرد نە سەیید شای عەبدولڕەزاق
فەرما ئەی فەرزەند گوزیدەی ئافاق
ها تۊم کەرد وە پیر سەرحەڵقە داران
وە سپاسالار سپای دین داران
چن ساڵ ئه و سەروەر سالاری کەردش
ئاخر وە عوسمان جبلی سپەردش
ئەویچ وە یەحیای بەسری وەش ‌فەڕ
خاستەر جە شاهی دارا و ئەسکەندەر
ئەویچ ئەوکۊی گەنج پەی نیکنامی
داش وە نورەدین شەریف شامی
شېخ عەبدولڕحمان حەسەنی نەسەب
فیوزات حەق کەردەبۍ تەڵەب
کەمەر پەی ئیرشاد بەستەبۍ یەقین
هەر ئەو مەشهوور بۍ جە لای نورەدین
جەودما مەعسووم بەدەوی یانە
یانی موحەممەد دانای دېوانە
جە شۊن مەعسووم عەبدولڕەزاقەن
قوتبی دایەرەی دەوری ئافاقەن
دیسان ئه و سەروەر دەریای مەعانی
داش وە سەی حەسەن شای ئەسمەرانی
باز ئەو جورعە نۊش باڎەی مەهجووری
داش وە شېخ ئەحمەڎ هیندی لاهوری
ئەو هەم نە کەلەش خېزا وە هەم دوود
قەسر نەهانیش دا وە شېخ مەحموود
شېخ ئەحمەد جە لای بابۊی وېش بەردش
تا تەسلیم وەشای خالسی کەردش
خاستەر جە دەنگ خورشید پەڕنوور
سەڎای دایەرەش مەشی وە لاهوور
ئەی یاگەی ئەعلا یاگەی ئامان بۍ
پیر بۍ نەزیر، شای تاڵابان بۍ
سەڵتەنە و سەتوەت جامەی گرامی
عەزیز و عیزەت بزورگ و نامی
لایەق وە شاهیی عەبدولڕەحمان بۍ
قوتب و دایەرەی دەور و زەمان بۍ
سەردار سوپای شەوبېڎاران بۍ
شەهنشای ئەیام تەکیەداران بۍ
شاهان سەر ئاوېز حەڵقەی دامش بۍ
حاتەم ڕېزەخار سفرە و خوانش بۍ
وە ئیشارەی عەین کیمیای نەزەر
خاک پاک مەکەرد وە تەڵای ئەحمەر
تا یەک شەو ئەویچ کۊچش هەم ئاوەرد
ئارەزووی خزمەت پېغەمبەرش کەرد
شېخ عەلی پیری فەرما ئەی فەرزەند
نووری دیڎە و دڵ ڕەشیدی دڵبەند
من پەی یانەی نۊ نە ئەی کونەدەیر
من خوڎاحافیز تۊ نیشە وە خەیر
یە تەکیەی پەڕشەوق یە دەوڵەت یە ماڵ
یە زومرەی دەروېش ساحیب جەزبە و حاڵ
کەشفم کەماڵم سڕ نیهانیم
مورشیدی ئەعلای غەوس گەیلانیم
سامم جەلالم زاتم جەوهەرم
ئەقوا و نەسیحەت دانەی گەوهەرم
بغەیر جە ئیمان نەی دنیای بېپۊ
تەمامی گشتم ها بەخشا وە تۊ
ئینە وات ناگا ڕۊحش پەرواز کەرد
تەشریف وە ڕەوزەی ڕزوانی حەق بەرد
جەودما وە حوکم دانای کردیگار
شاعەلی نە تەخت شاهی گرت قەرار
ئیسە جانشین جای ئه و خاسانەن
سەردار زومرەی حەق‌شناسانەن
شېخەن سالیکەن ئەولیای وەختەن
پیرەن ئوستادەن شای بوڵەند بەختەن
فیدای کەرکووک بام یانەی ئه و تېشەن
کەرکووک کەوسەرەن ساقی ئەو وېشەن
مەنبەعی ئەسرار فیوزات حەق
شارەزای سارای هەفت تاق ئەزرەق
بوڵەندتەر جە بورج سەیارەی حەفتەم
نایبول‌ئمور شای (غوثالاعظم)
(عالم العلوم) جە مەه تا ما هی
(مجمع‌البحرین) فەیز ئیلاهی
تەیر تەیارەی مەکان لاهووت
سەربەرز دیوان دانای لایەمووت
مەولای شەریعەت پیر تەریقەت
ئەعلای سەخاوەت یەکتای قەناعەت
ڕۊشنی شېوەی سەما و سەرزەمین
ساحیوی کەمەندی قیبلەی دنیا و دین
سوڵتانی ئیقلیم سپای سوڵتانان
شەیتان دوور ئەفکەن جە موسڵمانان
ئاهەن‌ڕۊبای عەشق بەند دەروون کېش
دەسگیر عالەم جە شا تا دەروېش
هەوای عەشق چېشەن نەفس ئەممارە
دوژمن فەنا دەر وە یەک ئیشارە
مەدەد یاعەلی شای تەکیەداران
سەردار سپای تاعەت گوزاران
فیدات بام یا شېخ (پانی الحیدر)
ئەمین دیوان خوڎا و پېغەمبەر
ئیسە دوور جە تۊ کەم ئیقباڵیەن
دنیا جە خاسان یەکسەر خاڵیەن
با جەتی خوڎا و عەشق پېغەمبەر
چەنی دەروېشان کەم‌لوتفی مەکەر
پایەت بوڵەند بۊ جەلای خوداوە
خسووسەن دەروېش بېنەوای پاوە
گشت هەر مونتەزیر پابۊس پاتەن
ئەروا دیڎە و دڵ یەکسەر فیداتەن
تاوانی زاڵم شووم بەڎکارەن
هەر یەک وە دەردی وېش گرفتارەن
جەوبۊنە کەم فام بەڎزات بەڐخۊن
مەحرووم و مەئیوس جە دیڎار تۊن
وەرنە ئېمە گشت جان ‌فیدای جانی
مەعلوومەن بە حەق تۊ وېت مەزانی
گۊشەی دامانت شای عەرعەر قامەت
وەر نەدەین جە دەس تا ڕۊی قیامەت
ساحیو ئەختیار ساحیوکار تۊنی
شای شەوکەت شیعار کەرەم بۍ شۊنی
هەنی وېت زانی چەنی خوڎای وېت
پیری دەروېشان سەرم بۊ فدېت
تاریخ تەسنیف سیلسیلەی وەش‌بۊ
هەزار و دووسەد نەوەڎ چەنی نۊ
وەفام و خەیاڵ هۊش مەستانە
خەتم بی بە نام شای کەرکووک یانە
(قاڎر) تا زیندەن جان‌فیدای جاتەن
ئەروا و دیڎە و دڵ یەکسەر فیداتەن.[1]